Kezekte turǵan qordaılyq 20 otbasy baspanaly boldy
Bul kúni jıyrma otbasy jeke jer telimderi bar kottedj tıpindegi páter kiltterine ıe boldy. Olardyń arasynda kópbalaly analar, dárigerler, muǵalimder, bıýdjettik sala qyzmetkerleri jáne basqalary bar.
Berdibek Saparbaev birqatar baspanany aralap kórdi. Úıli bolǵandary quttyqtap, olarǵa syılyqtar tabys etti.
«Bizdiń basty mindetimiz – halyqtyń, óńir turǵyndarynyń ál-aýqatyn jaqsartý. Aýdan tarıhynda mundaı jaǵdaı buryn-sońdy bolmaǵan. Atap aıtsaq, aýdanda 400-ge jýyq joba iske asyp, 4,5 myń jańa jumys orny ashyldy. Ol úshin memleketten 35 mıllıard teńge bólindi. Mysaly, jyl basynda qordaılyqtardyń gazben qamtamasyz etilýi 47 paıyzdy qurasa, jyl sońyna deıin 95 paıyzǵa jetpek. Bul baǵyttaǵy jumystar odan ári jalǵasady», - dep atap ótti Berdibek Saparbaev.
«Biz alǵashqy áskerı daıyndyq pániniń oqytýshysy bolyp jumys isteıtin jubaıymyz Ádil ekeýmiz alty balamyzmen birge birese úı jaldap, arasynda ata-analarymyzben birge turyp keldik. Mine, endi páterli bolyp baqyttan basymyz aınalýda. Aýmaǵy keń, zamanaýı jýynatyn bólmesi bar. Aınalasyndaǵy jer ýchaskesinde biz kóktemde mindetti túrde jumys isteıtin bolamyz. Búgingi qýanyshymmen quttyqtaýǵa meniń 86 jastaǵy anam, aǵalarym, týystarym kelýde. Táýelsizdik kúni qarsańyndaǵy osyndaı tosyn syı úshin Memleketke rızamyz», - dedi qýanyshyn jasyra almaǵan kópbalaly ana Samal Álıeva.
Barlyq úıler ınjenerlik jelilermen qamtylǵan. Jańa páterlerde kóp balaly jáne az qamtylǵan otbasylar turatyn bolady. Sondaı-aq, jas dárigerler, muǵalimder, aýyldyń ýchaskelik ınspektory da qyzmettik turǵyn úı retinde alty páterge qol jetkizdi.
Aýdandyq qurylys bóliminiń basshysy Eldos Meńdekeevtiń aıtýynsha, aýdan ortalyǵynda taǵy tórt kópqabatty úı salynýda. Olar jyl sońyna deıin paıdalanýǵa berilmek.
