Kezekte turǵan almatylyqtar páter kiltterin aldy
ALMATY. QazAqparat - Almaty ákimi Baqytjan Saǵyntaev Táýelsizdik mereıtoıyna oraılastyrylǵan saltanatty rásimde halyqtyń áleýmettik osal toptarynan kezekte turǵandarǵa páter kiltterin tapsyrdy, dep habarlaıdy QazAqparat tilshisi.
Qalanyń kommýnaldyq turǵyn úı qorynan turǵyn úı kezeginde turǵan halyqtyń áleýmettik osal toptaryna 211 páter bólindi. Turǵyn úı «Nurly jer» memlekettik baǵdarlamasy aıasynda salynǵan Alataý aýdanyndaǵy «Mádenıet» turǵyn úı kesheninde ornalasqan.
Baqytjan Saǵyntaev qala turǵyndaryn kele jatqan Táýelsizdik kúnimen quttyqtap, jańa baspanada jaqsylyq pen baqyt tiledi.
Jyl basynan beri 3761 muqtaj otbasy turǵyn úımen qamtamasyz etildi. Onyń ishinde «Baqytty otbasy» respýblıkalyq baǵdarlamasy aıasynda 156 kópbalaly, 43 tolyq emes jáne múgedek balalardy tárbıelep otyrǵan 242 otbasy 441 nesıelik zaem berildi.
«Shańyraq» baǵdarlamasy boıynsha 2146 nesıelik qaryz berildi. Qalalyq «Almaty jastary» jeńildetilgen nesıe baǵdarlamasy boıynsha 926 nesıe berildi.
Kommýnaldyq turǵyn úı qorynan 248 páter bólindi.
2021 jyldyń sońyna deıin jumys isteıtin jastar arasynda 1050 páterdi bólý aıaqtalady.
Jyl qorytyndysy boıynsha 5394 páter beriledi. Máselen, «Baqytty otbasy» respýblıkalyq baǵdarlamasy sheńberinde kópbalaly, tolyq emes jáne múgedek balalardy tárbıelep otyrǵan otbasylar úshin 1013 nesıe beriledi. «Shańyraq» baǵdarlamasy boıynsha – kezekte turǵandardyń barlyq sanattary úshin 2146 nesıe qarastyrylǵan.
«Almaty Jastary» qalalyq jeńildikpen nesıelendirý baǵdarlamasy boıynsha 926 nesıe berildi. Kópbalaly otbasylarǵa satyp alý quqyǵynsyz 267 jaldamaly páter bólindi.
Sondaı-aq, 29 jasqa deıingi jumys isteıtin jastarǵa 1050 páter beriledi.
