Kezekte turǵan almatylyqtar páter kiltin aldy
ALMATY. KAZINFORM — Almatyda kezekte turǵan taǵy 164 otbasy qonys toıyn toılaıdy.
Almaty qalasy kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkirulynyń aıtýynsha, jaldamaly páterler qalanyń kommýnaldyq turǵyn úı qorynan bólingen.
«Úı kezeginde turǵan 164 adam halyqtyń áleýmettik osal tobyna jatady. Bul jetim balalar, I jáne II toptaǵy múgedekter, múgedek balalardy tárbıelep otyrǵan otbasylar, zeınetkerler, tolyq emes otbasylar. Olar aı saıyn páterdiń jaldaý aqysyn tóleıdi. Bir bólmeli páterdi jalǵa alý quny shamamen 10 myń teńge, eki bólmeli páterge shamamen 15 000 teńge. Kommýnaldyq qyzmetke aı saıyn aqy tóleý qajet. Baǵdarlamanyń sharty boıynsha azamattarǵa páterdi jalǵa berýge nemese qaıta josparlaýǵa tyıym salynady», — dedi ol.
Páter kiltin alǵan eki balanyń anasy almatylyq Darıǵa Maqajanova ómir boıy 10 sharshy metr jataqhanada ápkesimen birge turyp kelgen.
«Meniń eki balam bar. Qyzym Arýjan múgedek. 2012 jyly men HQO-ǵa baryp, kezekke turdym. Qazir ápkemmen jáne balalarymmen bir bólmede turamyn. Óte tar, keıde aramyzda túsinispestik te týatyn. Páter kilti tabystalatynyn estigende, jyladym, senbedim. Bizge eki bólmeli páter berildi», — dedi ol.
On jyldan astam ýaqyt boıy turǵyn úıge kezeginde turǵan Álııa Bejanova da baspanaly boldy.
«Eki balammen birge talaı jyl kezekke turdym. Biz qazir qala syrtynda 120 myń teńgege páter jaldap turamyz. Bizge qońyraý shalyp, páter týraly aıtqan kezde senbedik. Basynda alaıaqtar dep oıladyq. Kópten kútken páterimiz úshin Almaty qalasynyń ákimdigine rahmet aıtamyz. Áli kúnge deıin qýanyshtan jylap júrmin», — dedi ol.
Esterińizge sala keteıik, birer kún buryn HÁOT sanatyndaǵy kezekte turǵan 124 adamǵa páter kilti tapsyrylǵan edi.
124 páterdiń 49-y — bir bólmeli, 75-i — eki bólmeli.
