Kezekshi synyptarda sabaq ýaqytyn qysqartýǵa bolmaıdy - Ashat Aımaǵambetov

NUR-SULTAN. QazAqparat - Kezekshi synyptarda sabaq ýaqytyn qysqartýǵa bolmaıdy. Bul týraly Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Bizde ádistemelik usynys bar. Kezekshi synyptardaǵy sabaq uzaqtyǵy 40 mınýtty quraýy tıistigine usynys bar ekendigi jaıynda aıtyp otyrmyz. Sondyqtan eger de sabaq ýaqytyn qysqartatyn mektepter bar bolatyn bolsa, onda biz olarmen túsindirý jumystaryn júrgizemiz», - dedi mınıstr BAQ ókilderiniń saýalyna oraı.

Sonymen qatar ol bul jaǵdaıdyń mán-jaıyn anyqtaıtyndyǵyn basa aıtty.

«Keıbir áriptesterimiz kezekshi synyptardy 1 saǵatqa syıdyrýǵa tyryssa, onda mundaı kezekshi synyptarda sabaq ótkizýdiń máni joq. Bul ata-analar úshin de qolaısyzdyq týdyrady. Eger ata-ana balasyn alyp kelip, bir saǵattan soń alyp ketýi tıis bolsa, onyń ústine biz úlgilik oqý baǵdarlamasyn ıgerýi qajettigin aıtsaq, onda bul durys emes. Sol sebepti tıisti jumystardy áriptesterimizden qaıtadan júrgizetin bolamyz», - dedi Ashat Aımaǵambetov.