Kezekshi synypqa baratyn oqýshylarǵa neni túsindirý kerek
ALMATY. QazAqparat –Almaty qalasy qoǵamdyq densaýlyq saqtaý basqarmanyń shtattan tys bas ınfektsıonısti Tamara Utaǵanova oqý jylynyń bastalýyna baılanysty ata-analarǵa saqtyq sharalary týraly aıtty, dep habarlaıdy QazAqparat tilshisi.
Infektsıonıst dáriger ata-analardyń balalarǵa óz áreketimen úlgi kórsetýi mańyzdy dep sanaıdy.
«Oqý jyly bastalǵaly beri mektepterde 1-2 synyp oqýshylaryna arnalǵan kezekshi toptary ashylady. Epıdemıologııalyq ahýaldy eskere otyryp, ata-analarda mektepke baratyn balalardyń qaýipsizdigi týraly oryndy suraqtar týary sózsiz. Ata-analar balalaryna KVI týraly túsindirýi tıis. Balalar eger karantın talaptaryn saqtamaǵan jaǵdaıda karantın kezindegi ahýal qaıtyp keletinin túsinýi tıis. Demalysqa barmaı, úıde qamalyp otyryp qalýy múmkin. Biz balalarǵa tek ózimiz úlgi bola alamyz», - dedi Tamara Utaǵanova Almatyda ótken onlaın brıfıng barysynda.
Infektsıonıst maman ınternette tarap jatqan Kavasakı tektes sındrom týraly aqparatqa qatysty da oıyn aıtty.
«KVI aýyrǵan balalarda Kavasakı tektes sındrom sııaqty asqynýlar bolatyny dáleldendi. Osyǵan baılanysty profılaktıkalyq sharalardy saqtaý óte ózekti bolyp otyr. Ondaı derekter bizde qazir tirkelip jatyr. Alaıda, bul aýrýdyń klınıkalyq belgileri áli zerttelýde, ol uzaq zertteýdi talap etedi», - dedi «I.Jekenova atyndaǵy qalalyq klınıkalyq juqpaly aýrýlar aýrýhanasy» MKK dáriger-sarapshysy T.Utaǵanova.
