Kezdesýde kóshi-qon máseleleri sóz boldy
V.Bobrov Qazaqstan kóshi-qon máselesine aıryqsha mán beretinin jetkizdi. Elimiz kóshi-qonǵa qatysty kelisimder boıynsha óz mindetterin oryndap kele jatqanyn aıtty. «Qazaqstanda etnıkalyq qazaqtardyń atajurtyna oralýyna basymdyq berilgen. Soǵan oraı 2009-2011 jyldardy qamtyǵan «Nurly kósh» baǵdarlamasy ómirge keldi jáne óz nátıjesin berýde. Oralmandardyń jańa oryndarǵa qonystanýyna, jumyspen qamtylýyna mán berilýde»,- dedi Májilisi Tóraǵasynyń orynbasary V.Bobrov.
Aıta ketý kerek, Qazaqstan - ár túrli tarıhı almaǵaıyp zamandarda shetelge aýyp ketken baýyrlaryn óz atamekenine shaqyrǵan jáne kóshi-qon saıasatyn durys júrgizip otyrǵan sanaýly elderdiń biri. 1993 jyldan beri qandastarymyzdyń atajurtyna birjola kóship kelýi kvota boıynsha júzege asyrylýda. Memleket basshysynyń tapsyrmasyna sáıkes 2009 jyldan bastap jylyna 20 myńdaı otbasynyń qonys aýdarýyna kvota bólinip keledi. 1991 jyldan 2009 jylǵa deıin elimiz 789,3 myń etnıkalyq qazaqtardy qabyldady.
Búgingi tańda Qazaqstan Parlamenti Májilisinde «Kóshi-qon týraly» jańa zań jobasy talqylanyp jatyr.
Óz kezeginde Laýra Tompson hanym kóshi-qon máselesin rettep boldym deıtin birde-bir memleket joq ekenin, barlyq jaǵdaıdy jasaǵan kúnniń ózinde máseleler týyndap otyratynyn aıtty. Sondyqtan kóshi-qonǵa qatysty kún tártibindegi máselelerdi tıimdi jolmen sheshý qajet. Buryn kóptegen elder kóshi-qonǵa qaýipsizdik máselesi turǵysynan qaraǵan. Búgingi tańda onyń áleýmettik jáne ekonomıkalyq jaǵy da eskerilip otyr.
Kezdesýde taraptar kóshi-qon máselesin jan-jaqty qarastyrý, zań joldarymen retteý týraly pikir almasty. Osy oraıda aldaǵy ýaqytta Qazaqstannyń Kóshi-qon jónindegi halyqaralyq uıymymen arasyndaǵy yntymaqtastyq baılanysty damytýdyń mańyzdylyǵy sóz boldy.
Osy kezdesýge atalǵan uıym tarabynan KHU-nyń Qazaqstan, Qyrǵyzstan, Tájikstan jáne Ózbekstandaǵy mıssııasynyń jetekshisi, KHU-nyń Ortalyq Azııadaǵy úılestirýshisi Zlatko Zıgıch, KHU-nyń Qazaqstandaǵy mıssııasy jetekshisiniń orynbasary Pavel Shalýs, KHU-nyń ulttyq baǵdarlamasynyń úılestirýshisi Svetlana Bekmambetova, al Qazaqstan tarabynan Májilistiń Áleýmettik-mádenı damý komıtetiniń tóraıymy Dınar Nóketaeva, Zańnama jáne sot-quqyqtyq reforma komıtetiniń hatshysy Svetlana Bychkova, Ekologııa máseleleri jáne tabıǵat paıdalaný komıtetiniń múshesi Aıtkúl Samaqova, Áleýmettik-mádenı damý komıtetiniń múshesi Jarasbaı Súleımenov qatysty.
