Kezdesýde ana tilimizde sóılesýimiz táýelsiz memleket ekendigimizdi dáleldeıdi — Hachatýrıan

ASTANA. KAZINFORM — Armenııa Prezıdenti Vaagn Hachatýrıan Qazaqstanǵa resmı sapary aıasynda Memlekettik basqarý akademııasy tyńdaýshylaryna dáris oqydy. Ol «Armıandyq «beıbitshilik tiregi»: Ońtústik Kavkazdyń ulttyq artyqshylyǵy jáne turaqty damýynyń kepili» taqyrybyndaǵy dárisin armıan tilinde júrgizdi.

«Men armıan tilinde sóz sóıleımin. Degenmen, ekranda usynatyn materıal aǵylshyn tilinde aralas bolady. Eger aýdarma jaqsy bolsa, onda bári durys. Armıan tilinde orysshaǵa aýdarmamen bolady. Eger durys bolmasa, orys tiline kóshemin. Sizderdiń bizdiń ana tilimizdi, bizdiń sizderdiń ana tilderińizdi estigenimiz óte mańyzdy. Resmı kezdesýlerde men de, Premer-Mınıstrimiz de óz tilimizde, Qazaqstan tarapy qazaq tilinde sóıleıdi. Muny óte mańyzdy dep sanaımyn. Bul ózimizdi kórsetý úshin jasalatyn protsedýra ǵana emes. Bul shyn máninde bizdiń táýelsiz, baqýatty memleket ekendigimizdi taǵy bir márte dáleldeıdi», — dedi Armııan Prezıdenti.

Vaagn Hachatýrıan dáris barysynda Armenııanyń memlekettik basqarý qurylymyna, óńirdegi róline, tarıhyna, kólik-logıstıkalyq áleýetine, áleýmettik-ekonomıkalyq salasyna, ınvestıtsııa tartý, eldegi jumyssyzdyq máselelerine toqtaldy.

«Eldegi jumyssyzdyq 12 paıyzdy quraıdy. Biraq, bul shartty túrde ǵana. Óıtkeni, bizde jumys kúshi tapshylyǵy bar. Otandastarymyz ózderine tıimsiz bolǵandyqtan, belgili bir salada jumys istegileri kelmeıdi. Sondyqtan olar jumyssyzdar dep sanalady. Degenmen, bizdiń kóshi-qon saıasatymyz bar jáne sol arqyly Úndistannan, basqa da shet memleketterden jumys kúshin shaqyramyz. Túrli baǵalaýlarǵa sáıkes, jumyssyzdyq deńgeıi 5 paıyzdan aspaýy tıis», — dedi Vaagn Hachatýrıan.

Keshe Aqordada Armenııa Prezıdenti Vaagn Hachatýrıandy saltanatty qarsy alý rásimi ótti.

Sonymen qatar eki el basshylary Qalıbek Qýanyshbaev atyndaǵy Qazaq ulttyq mýzykalyq drama teatrynda Armenııanyń mádenıet kúnderine oraı uıymdastyrylǵan saltanatty kontsertke bardy.