Kezdesýde adam quqyǵy men beıbitshilik máseleleri sóz boldy
sp;ASTANA. Jeltoqsannyń 8-i. QazAqparat /Aıdyn Báımen/ - Búgin QR Parlamenti Májilisiniń Tóraǵasy Oral Muhamedjanov Norvegııadan kelgen, Beıbitshilik jáne adam quqyǵy ortalyǵynyń prezıdenti Kel Magne Bondevık myrzany qabyldady,
dep habarlaıdy QazAqparat.
Aıta ketý kerek, norvegııalyq meıman Astanaǵa úshinshi ret kelip otyr. Meıman: «Men alǵash ret kóktemde Premer-mınıstr bolyp turǵan kezimde keldim, ekinshi ret dinder konferentsııasyna oraı elordaǵa at basyn tirep edim. Osy joly qystyń sýyǵynda keldim. Mundaı sýyq bizdiń elde qańtar, aqpan aılarynda ǵana bolady. Alaıda, kúnniń sýyqtyǵy eki eldiń ystyq yqylasqa toly qaram-qatynasyna eshqandaı áser etpeıdi»,- dep óz oıymen bólisti.
Aldaǵy Qazaqstannyń EQYU-ǵa tóraǵalyq etýi eldiń ómirinde úlken mańyzǵa ıe ekenin aıtyp ótti. Qazaqstannyń ustanǵan baǵytymen tanys ekenin bildirdi.
Kezdesýde Májilis Tóraǵasy qazir Qazaqstan tarıhı kezeńniń aldynda turǵanyn málim etti. Beıbitsúıgish elimiz EQYU-ǵa tóraǵalyq etken kezde álemde tynyshtyq pen qaýipsizdikti saqtaý maqsatynda izgi bastamalardy júzege asyrýdy kózdep otyrǵanyn jetkizdi.
«Qazaqstan alǵashqy kúnnen bastap ózin demokratııalyq el dep jarııalady. Bizdiń elde adam quqyǵy saqtalady. Júzden astam ulttyń ókilderi beıbit ómir súrýde. Qazaqstan halqy Assambleıasynyń qurylǵanyna 15 jyldaı ýaqyt boldy. Úsh ret Álemdik dinder kóshbasshylarynyń sezi ótti. Bul - táýelsiz jas memlekettiń órkenıetke bastaǵan joly»,- dedi Májilis Tóraǵasy Oral Muhamedjanov.
Meıman K.M. Bondevık jyly júzdesý bolǵany úshin rızashylyǵyn bildirdi. Osy kezdesýge Qazaqstan Respýblıkasy Parlamenti Májilisiniń depýtaty, Qazaqstan Respýblıkasy Prezıdenti janyndaǵy Adam quqyǵy jónindegi komıssııanyń tóraǵasy Saǵynbek Tursynov qatysyp, elimizde adam quqyǵynyń qorǵalýy týraly oılaryn ortaǵa saldy.
