Kez kelgen túıindi másele ózi sheshimin tabýy tıis – Baqyt Janshaeva

AQTÓBE. QazAqparat – Aqtóbelik qoǵam belsendisi Baqyt Janshaeva sheshimi kezek kúttirmeıtin máselelerdi, halyqty tolǵandyrǵan suraqtardy atqarýshy organǵa jetkizip otyrady. Ol bul qoǵamdyq jumystyń tıimdi tustaryn QazAqparat tilshisine aıtyp berdi.

Aqparat jáne qoǵamdyq damý mınıstrliginiń bastamasymen qurylǵan qoǵamdyq baqylaýdyń Aqtóbe oblysy boıynsha úılestirýshisi Baqyt Janshaeva óńir turǵyndaryna jaqsy tanys. Jýrnalıst ári qoǵam belsendisi sońǵy jyldary kópbalaly analar máselesin jıi kóterip júr. Koronavırýs ınfektsııasy beleń alyp, karantın sharasy kúsheıgen kezde sanıtarııa talabyn saqtaý, dezınfektsııa jumystaryn júrgizýdi baqylap, áleýmettik tólem máselelerin ótkir kóterdi. Oblys ákimi janynan qurylǵan monıtorıng toppen kóshelerdi aralap, saýda oryndarynyń jumysyn qadaǵalady.

«Mobıldi top quramynda avtobýstardyń jumysyn baqylap, saıabaqtarda monıtorıng júrgizdik. Tek qadaǵalaý ǵana emes, túsindirýmen de aınalystyq. Sońǵy aıaldamaǵa baryp, dezınfektsııany qalaı jasaıtynyn qaradyq. Jolaýshylarǵa maska taǵýdyń mańyzyn qaıta-qaıta eske salyp otyrýǵa týra keledi. Saıabaqta da dál sondaı jaǵdaı. «Taza aýada otyrmyz, taǵý mindetti emes» dep ýáj aıtatyndar bar. Sanıtarııa talaby boıynsha bir otbasydan bolmasa, saıabaqta betperdesin taǵyp, araqashyqtyqty saqtaýlary kerek. Munyń bári ýaqyt talaby», - dedi Baqyt Janshaeva.
Qoǵam belsendisi demalys kúnderi de baqylaý jumysyn jalǵastyrady. «Ana men bala» saıabaǵyna baryp, onvń qaşirgi jaı-kúıine qatysty máselelerdi qaıta kóterdi.
«Biz karantın kezinde ǵana emes, buryn da óńirdegi isterdiń olqy tustaryn jıi kóterip júmiz. Máselen, saıabaqqa barǵanda oıyn alańdaryndaǵy qoqys, ondaǵy shamdardyń synyp, tozyǵy jetkenin, attraktsıondardyń jaramsyz kúıge túskenin sýretke túsirip, atqarýshy organǵa joldadym. Bul qoǵamdyq oryn, únemi kútimdi qajet etedi. Sondyqtan qala ákimdigi únemi nazarda ustap, qalpyna keltirýi tıis. Kógaldandyrý jumystary da aqsap tur», - dedi qoǵam belsendisi.
Aqparat jáne qoǵamdyq damý mınıstrliginiń bastamasymen qurylǵan qoǵamdyq baqylaýǵa úlken júk artyldy. Bul qoǵam men atqarýshy organ arasyndaǵy baılanysty tyǵaıta túsetin tetik.
«Zańsyzdyqty kórip, úndemeı qalýǵa bolmaıdy. Máselen, dárihanada baǵa kóterildi. Sebebin bilýge árkimniń quqyǵy bar. Dúkenderde sanıtarııa talabyn saqtalmasa, tutynýshy quqyǵynyń buzylǵany. Tek oblys ortalyǵynda emes, aýdandarda da bul jumys jolǵa qoıylǵan. Foto, vıdeo materıaldar jiberedi. Maǵan túsken aqparattardy jaýapty organdarǵa jiberemin», - dedi Baqyt Janshaeva.