Kez kelgen qaqtyǵysty dıplomatııalyq jolmen sheshýdi jaqtaımyz —Toqaev
ASTANA. KAZINFORM — Memleket basshysy jańa Konstıtýtsııa jobasyna qatysty referendýmda daýys bergennen keıin jýrnalısterge arnalǵan brıfıng ótkizdi. Bul týraly Aqordanyń baspasóz qyzmeti habarlady.
Brıfıng barysynda jýrnalıst «Qazaqstan halyqaralyq qaqtyǵystardy árdaıym dıplomatııalyq jolmen sheshýdi jaqtaıdy. Siz bul ustanymdy jaqynda Taıaý Shyǵystaǵy ahýalǵa qatysty málimdemelerińiz arqyly rastadyńyz. Sondaı-aq Shyǵanaqtaǵy birqatar memleket basshysymen telefon arqyly sóılesip, olarǵa qoldaý bildirdińiz. Biraq Iran Prezıdentimen sóılespedińiz. Bul Qazaqstannyń beıtarap ustanymynan aınyp, arab elderin qoldaıtynyn bildire me?» degen saýal qoıdy.
— Qazaqstan álemge beıbit el retinde belgili. Kez kelgen qaqtyǵysty dıplomatııalyq jolmen sheshýdi jaqtaımyz. Bul –aınymas ustanymymyz. Taıaý Shyǵysta oryn alǵan jaǵdaıdyń túrli sebebi bar. Men muny jaqynda ótken alqaly jıynda da aıtqanmyn. Rasynda, Shyǵanaqtaǵy arab elderiniń basshylarymen telefon arqyly sóılestim, tilektes ekenimdi jetkizdim. Al Iran Prezıdenti Masýd Pezeshkıannyń jaqynda elimizge resmı saparmen kelgenin bilesizder. Sol kezde jaqsy áser qaldyrdy. Ol — zaıyrly kózqarastaǵy adam, ózi kardıohırýrg. Men onyń Iran Shyǵanaq elderine shabýyl jasamaıdy degen málimdemesin quptadym.
Tipti, ol Irannyń atynan keshirim surady. Alaıda keıin onyń málimdemesi joqqa shyǵaryldy. Iran arab elderine shabýyl jasaýdy áli toqtatqan joq. Budan Iran Prezıdentiniń bılikke tolyq ıe emes ekeni kórinedi. Ol anyq. Men eshkimdi aıyptamaımyn, jaı ǵana fakti retinde aıtyp otyrmyn. Bul Iran bıliginiń ereksheligine baılanysty dep oılaımyn. Bir jaǵynan dinı bılik ústemdik etedi.
Óıtkeni Iranda dinı bılik negizgi baǵyt-baǵdardy aıqyndap, sheshim qabyldaıdy. Prezıdent te bar, biraq ol — formaldy memleket basshysy, is júzinde yqpaldy tulǵa sanalmaıdy. Jalpy, kez kelgen elde, sonyń ishinde Qazaqstanda qos bılik bolmaýǵa tıis. Kezinde mundaı júıeni biz de bastan ótkerdik, biraq baıansyz boldy. Tórt jyl buryn elimizdiń ishki turaqtylyǵyna qaýip tóndi. Bul Qazaqstanǵa da, basqa memleketterge de úlken sabaq boldy dep oılaımyn. Biz Iran halqyna, onyń mádenıeti men tarıhyna qurmetpen qaraımyz. Sondyqtan óz ustanymymyzdan aınyǵan joqpyz, árdaıym beıbitsúıgish el bolyp qala beremiz.
Aıta ketelik Prezıdent Qasym-Jomart Toqaev respýblıkalyq referendýmda daýys bergen edi.
