Kez kelgen eńbek qadirli: Pavlodarda respýblıkalyq jastar forýmy ótip jatyr
PAVLODAR. KAZINFORM — Halyqaralyq jastar kúnine oraı Ertis boıynda respýblıkalyq jastar forýmy bastaldy. Ekikúndik jıynǵa elimizdiń ár óńirinen belsendi, eńbekqor ári bolashaǵynan úmit kúttiretin 100-den astam jas maman jınaldy.
Pavlodar oblysy Jumysshy mamandyqtar jylynda kóptegen iri sharanyń ortalyǵyna aınalyp otyr. Sonyń biri Halyqaralyq jastar kúnine oraı uıymdastyrylǵan respýblıkalyq jastar forýmy. Uıymdastyrýshylar atap ótkendeı, jıynnyń maqsaty — jas mamandardyń kóshbasshylyq qasıetterin, kásibı quzyrettilikterin jáne óz salasy men óńiriniń bolashaǵyna jaýapkershiligin damytýǵa jaǵdaı jasaý.
Jınalǵandar tájirıbe almasyp, kásibı ósý joldaryn keńeıtip, tabysty eńbek jolynyń úlgilerine qanyqty. Otandyq óndiristi jańǵyrtý úderisterine jastardyń qatysýyn kúsheıtý, mansaptyq múmkindikterdi keńeıtý baǵytyndaǵy taqyryptyq sessııalar, trenıngter, pikirtalas alańdarynda kóptegen tyń jáne qyzyqty maǵlumat aıtyldy. Jastar eki kúndik forýmda Pavlodar qalasynyń ásem jerlerimen, óndiristik kásiporyndarymen tanysyp, ózderi úshin paıdaly tustardy kóńilderine toqyp qaıtqany daýsyz.
Memleket basshysy halyqqa Joldaýynda jumysshy mamandyqtarǵa erekshe nazar aýdaryp, jumys berýshilerdi mamandardyń qoǵamdaǵy mártebesin kóterýge shaqyrǵany málim. Prezıdenttiń aıtýynsha, jumysshy mamandyqtar jyly qoǵamda eńbekqorlyq pen kásipqoılyq ıdeıasyn ilgeriletýge yqpal etedi.
–Jumysshy mamandyqtar oryndaryn damytý — el bolashaǵyna, onyń tehnologııalyq jáne ekonomıkalyq damýyna salynǵan ınvestıtsııa. Ertistiń Pavlodar óńiri — ónerkásibi damyǵan aımaq. El ekonomıkasynyń ilgerileýine aıtarlyqtaı mol úlesin qosyp otyr. Oblys boıynsha 250 myńnan astam jas býyn ókilderi bar. Olar júzdegen mamandyqty ıgerip, árkim ózi qalaǵan salada nan taýyp júr. Jumysshy mamandyqtary jylynda biz qarapaıym eńbek adamdaryn úlgi etip, jastardyń nazaryn jumysshy mamandyqtaryna qaraı burýǵa talpynyp jatyrmyz, — dep atap ótti Pavlodar oblysy ákiminiń orynbasary Aıgúl Malıkova forýmnyń ashylý saltanatynda.
Mádenıet jáne aqparat vıtse-mınıstri Evgenıı Kochetov turǵyndardyń úshten birin jastar qaýymy quraıtynyn jetkizdi. Onyń sózinshe, zamanǵa saı kásiptik-tehnıkalyq mamandyqtardy ıgergen jastarǵa óndiris oryndarynan suranys kúnnen-kúnge ósip keledi.
— Jumysshy mamandyqtarynyń mártebesin arttyrý jáne sheberlik daǵdylaryn damytýǵa baǵyttalǵan WorldSkills qozǵalysy, «Daryn», «Táýelsizdik urpaqtary» syılyqtary, túrli granttar men shákirtaqylar, jobalar, konkýrstar jastar úshin mamandyq tańdaýda úlken serpin berdi dep aýyz toltyryp aıta alamyz. Orta kásiptik oqý oryndarynda sońǵy úsh jylda shákirtaqy mólsheri eki ese ósti. Jas otbasylardy baspanamen qamtýǵa arnalǵan «Naýryz Jumysker» ıpotekalyq baǵdarlamasy da qabyldandy. Munyń syrtynda kóptegen iri kásiporyndar óz jas mamandaryn qoldap, jeke áleýmettik baǵdarlamalar túzip jatyr. Munyń barlyǵy Memleket basshysy bergen tapsyrmalardyń óz ornymen iske asyp jatqanyn bildiredi. Bul tusta Pavlodar oblysy jastar saıasatyn damytýda kóshbasshylar qatarynda ekenin aıtyp ótkizim keledi, — dedi Evgenıı Kochetov.
Oblystyq máslıhat tóraǵasy Ilıa Terenchenko búginde oblystyq depýtattar korpýsynyń 30 paıyzdan astamy jastar ekenin atap ótti. Al óńir boıynsha bes saıası partııa fılıaldarynyń tórteýin jastar basqaryp otyr.
Forým qatysýshylarynyń biri Alpamys Mereı Óskemendegi «QazTsınk» JShS-nan kelipti. Aıtýynsha, Altaı qalasynyń Malevskıı kenishinde ken tıegish tehnıkanyń mashınısi bolyp eńbek etedi. Kásiporynda 7 jyldaı jumys isteıdi.
— Buryn memlekettik qyzmette, áskerge shaqyrý komısarıatynda qyzmet ettim. Arada biraz ýaqyt ótkende óndiriske barýǵa bel býdym. Qazirgi ýaqytta bul sheshimimniń durys bolǵanyna kózim jetip otyr. Eńbekaqymyz joǵary, jumys berýshi arnaıy kıimmen, jumys barysynda tamaqpen qamtamasyz etedi. Jylyna 2 ret eńbek demalysyna jiberip turady. Eń bastysy, óndiris ornynyń arqasynda 2 joǵary bilimdi ıgerdim. Biri metallýrg mamandyǵy bolsa, ekinshisi dene shynyqtyrý pedagogy mamandyǵy. Ekeýiniń de oqý aqysyn kásiporyn tolyq ótep berdi. Jas otbasylardy únemi qoldap, otyn-sýyna septesedi, — deıdi jas maman.
Al ERG kompanııasynyń Astana qalasyndaǵy bas keńsesiniń analıtigi, kompanııadaǵy jastar lıgasynyń elordadaǵy keńse basshysy Nurjan Abdıkerov jas mamandardy óndiris ornyna tartý jáne jastar resýrstaryn damytýǵa qatysty óz oılarymyn bólisti.
— Kóp jastar óndiriste eski tehnologııa qoldanylyp, adamdar shań-tozańy burqyraǵan, aýyr jaǵdaıda eńbek etedi dep oılaıdy. Shyn máninde qazir bizdiń kásiporyndardyń barlyǵy derlik jańa tehnologııamen jaraqtalǵan, ozyq ádis-amaldar engizilip, qyzmetkerlerimizdiń densaýlyǵy men ómirine qaýip tóndiretin qaýip-qaterler barynsha azaıtylǵan. Jarqyraǵan tsehtardy kórgen bolashaq mamandar shyn máninde tańyrqap qalady. Sebebi olardyń oılary múlde basqa aýanda bolyp kelgen. Sondyqtan jastardy óndiris ornymen jıi tanystyrýǵa, óndiriske erte bastan úıretýge den qoıyp otyrmyz. Keıbir belsendi jas jumysshylardy bir kúnge ýchaske basshysy, sheber etip taǵaıyndap, óziniń múmkindigin kórsetýge erik beremiz. Ózim de qarapaıym marksheıder bolyp bastaǵan edim, basshylar belsendigimdi baıqap, qazirgi kúni jaýapty qyzmetter berip otyr, — dep jetistigimen bólisti Nurjan.
Forým aıasynda erteń aýqymdy kórme uıymdastyrylady dep kútilip otyr. Oǵan elimizdiń 40-tan astam ónerkásip jáne taýar óndirýshi kásiporyndary qatysyp, óz ónimderin, eń jańa ázirlemelerin jáne qyzmetterin usynady. Qatysýshylar arnaıy kórsetilim aımaqtaryn, sheberlik sabaqtaryn jáne prezentatsııalar uıymdastyrady.
Buǵan deıin Jumysshy mamandyqtar jyly aıasynda kolledjdermen áriptestik ornatqan kásiporyndar sany artqany týraly jazǵanbyz.