Kez kelgen ánshige halyqaralyq baıqaýda jeńiske jetý úshin durys án tańdaý mańyzdy - J. Duǵalova
ALMATY. QazAqparat- Kez kelgen ánshige, meıli ol jas bolsyn, eresek bolsyn, halyqaralyq baıqaýda jeńiske jetý úshin birinshi kezekte durys án tańdaý mańyzdy.
Bul týraly búgin Almatyda túrki tildes elderdiń tarıhynda tuńǵysh ret qolǵa alynǵan «Bala Turkvizyon» Halyqaralyq balalar áni baıqaýyna irikteý sharalarynyń bastalýyna qatysty ótken baspasóz máslıhatynda belgili ánshi, «Turkvizyon-2014» baıqaýynyń jeńimpazy Janar Duǵalova málim etti.
«Men, árıne qazylar alqasynyń múshesi emespin. Biraq, kez kelgen ánshige, meıli ol jas bolsyn, eresek bolsyn, halyqaralyq baıqaýda jeńiske jetý úshin birinshi kezekte durys án tańdaý mańyzdy. Óıtkeni, bala qansha jerden daryndy bolǵanymen durys án tańdap alynbasa, ol óz ónerin ashyp kórsete almaıdy. Sondyqtan, osy jaǵyna kóp kóńil bólý qajet» - dedi J. Duǵalova.
Sonymen qatar, Janar «Bala Turkvizyon» Halyqaralyq balalar áni baıqaýynyń jas talanttar úshin mańyzdy shara ekendigin aıtty.
«Shyny kerek, qazir balalar arasynda ótetin án baıqaýlary kóp emes. Sondyqtan bul óte mańyzdy bastama bolaıyn dep tur. Ol, balalarǵa óz ónerlerin búkil túrki álemine tanytýǵa múmkindik beredi. Sonyń arqasynda Qazaqstannyń da bedeli arta túsedi. Men tálimgerlerge jáne árbir jas talantqa sáttilik tileımin. Bastama uzaǵynan bolsyn. Qazaqstannyń án áleminde jańa juldyzdar jarqyrasyn!» - dedi J. Duǵalova.
