Kez kelgen adamǵa eldiń saıası ómirine tikeleı aralasýyna múmkindik bar — Májilis tóraǵasy
ASTANA. KAZINFORM — Jyl boıy saılaý ótkizý qalypty qubylysqa aınaldy. Bul týraly Parlament Májilisiniń tóraǵasy Erlan Qoshanov málim etti.
— Jalpy, bul jolǵy Joldaý Prezıdentimizdiń «barlyq reformanyń ózegi — adam» degen basty qaǵıdatty úzdiksiz ustanyp kele jatqanyn taǵy da dáleldedi. Elimizde atqarylyp jatqan ıgi isterdiń barlyǵy halyq úshin jáne halyqpen birge jasalyp jatyr. Bul — Memleket basshysynyń berik ustanymy. Osy rette, Joldaýda elimiz úshin taǵy bir mańyzdy reformany qolǵa alý usynyldy. Ol — Parlamenttik reforma, ıaǵnı bolashaqta bir palataly Parlament júıesine kóshý. Muny da halyqpen birge talqylap sheshý qajet dedi. Memleketimizdiń bolashaǵyna qatysty taǵdyrsheshti máseleniń bári halyqtyń talqysyna salynyp, sheshim qabyldaýdy halyqtyń ózine berý — Prezıdentke tán ashyq basqarý stıli. Bul azamattardyń pikirin qurmetteý jáne jańa saıası mádenıet qalyptasqanyn kórsetedi. Bir palataly Parlament ıdeıasy qoǵamda biraz ýaqyttan beri talqylanyp keledi, — dedi Erlan Qoshanov Májilistiń jalpy otyrysynda.
Osy oraıda ol 2022 jylǵy konstıtýtsııalyq reforma barysynda osy baǵyttaǵy alǵashqy qadamdar jasalǵanyn eske saldy.
— Parlamenttiń róli edáýir artqanyn ózderińiz bilesizder. Sondyqtan bul bastama kezeń-kezeńimen iske asyp kele jatqan júıeli, baıypty reformalardyń jalǵasy retinde qabyldanýy qajet. Ol uzaq ýaqytty ári tutas qoǵamnyń atsalysýyn talap etetin tereń ınstıtýtsıonaldyq reforma ekenin túsingen jón. Sondyqtan aldaǵy jyly sarapshylardyń, saıası partııalardyń, azamattyq qoǵamnyń qatysýymen jan-jaqty talqylaý júrgizemiz. Osy jumysqa barlyq saıası partııa belsene atsalysýy qajet. Bul reforma Konstıtýtsııaǵa jáne konstıtýtsııalyq zańdarǵa ózgeristerdi qajet etedi. Osy jerde men myna máselege de nazar aýdarǵym kelip otyr. Búginde kez kelgen adamǵa eldiń saıası ómirine erkin ári tikeleı aralasýyna tolyq múmkindik bar. Aýyl, aýdan, qala ákimderin tikeleı saılaý júıesi ornyqty. Jergilikti máslıhattarǵa da majorıtarlyq júıe arqyly saılaý ótip jatyr. Jyl boıy saılaý ótkizý qalypty qubylysqa aınaldy. Keshegi Joldaýynda Prezıdent keleshektegi bir palataly Parlamentti partııalyq tizimmen jasaqtaýdy usyndy. Bul partııalardyń rólin de, bedelin de arttyra túsedi, — dedi Májilis tóraǵasy.
Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.