Kez kelgen adam oıyn-saýyq ortalyqtarynyń órt qaýipsizdigin teksere alady
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi órt qaýipsizdigi boıynsha ókiletti organdarmen birge el turǵyndaryn nysandardy ınspektsııalaýdy usyndy. Bul týraly atalǵan vedomstvonyń baspasóz qyzmeti málim etti, dep habarlaıdy QazAqparat.
«Agenttik TJ komıtetimen birlese eldegi 1 151 saýda ortalyǵynda órt qaýipsizdigi erejesin saqtaýǵa qatysty tekserýler protsesine el azamattaryn jumyldyrýdy josparlady», - delingen habarlamada.
Atap aıtqanda, 29 naýryzda TJ komıtetinde ótken vedomstvoaralyq keńes aıasynda josparlanǵan tekserýlerge aýqymdy qoǵamdyq baqylaýdyń qajettigi týraly sheshim qabyldandy.
Osy oraıda kez kelgen adam ókiletti organdarmen birlese nysandardy ınspektsııalaýǵa qatysa alady dep qarastyrylyp otyr. Ol úshin tanymal messendjerler men áleýmettik jeliler arqyly agenttiktiń tıisti óńirlik departamentine aldyn ala ótinim jasaý kerek.
Sonymen qatar, tekserý sharalarynyń belsendi qatysýshylary retinde agenttiktiń arnaıy monıtorıngtik toptarynyń músheleri de bolady. Olardyń arasynda túrli salalardyń sarapshylary qamtylǵan.
Munymen qosa, kásipkerler ınspektorlardyń zańsyz is-qımyldaryna tap bolsa, onda kórsetilgen baılanys jelileri boıynsha shaǵymdana alady.
Budan bólek, agenttik el turǵyndary men úkimettik emes sektor uıymdaryn túrli baǵyttar boıynsha «Qoǵamdyq baqylaý kartasy» jobasyn júzege asyrýǵa belsendi qatysýǵa shaqyrady.
