Keıýanany tonaǵan uryny ustaǵan polıtseı: Mindetimiz – qoǵamdyq tártipti qadaǵalaý
ÓSKEMEN. QazAqparat – Shyǵys Qazaqstan oblysy Altaı aýdanynda qart kisiniń qolyndaǵy paketin tartyp alyp qasha jónelgen áıeldi kórgen ýchaskelik ınspektor Erlan Asanov lezde onyń sońyna túsken. Kóp uzamaı ony qýyp jetken tártip saqshysy jábirlenýshiniń jeke zattary men aqshasyn qaıtaryp berdi. Polıtsııa kapıtany oqıǵanyń búge-shúgesin QazAqparat tilshisine aıtyp berdi.
Oqıǵa qarasha aıynyń basynda Altaı qalasynda bolǵan. Ýchaskelik ınspektor Erlan Asanov «Ýchaske» jedel aldyn alý sharasy barysynda Solnechnoe kóshesindegi kópqabatty turǵyn úıge kelgen. Kenet podezdiń aldyndaǵy aıqaı-shýdy estip qalady.
«Dalaǵa shyqsam qart kisiniń qolyndaǵy paketti julyp alǵan áıel qashyp barady. Lezde onyń sońyna tústim. Tonaýshy pakettiń ishindegi ámııannan aqshany aldy da, qalǵanyn tastaı saldy. 50 metrdeı jerdegi áıel adamdy kóp uzamaı qýyp jettim. Sońynan anyqtalǵandaı, ol buǵan deıin sotty bolmaǵan eken. Aıtýynsha, qylmysqa ishimdikke aqsha jetpegennen keıin barǵan», - deıdi tártip saqshysy.
Osylaısha, polıtseı zeınetkerge jeke zattary men aqshasyn qaıtaryp berdi. Tonaýshy paketti qolynan jibergisi kelmegen jábirlenýshini jerge qulatyp, súıregen. Erlan Asanov qylmys jasaǵan adamdy qolǵa túsirgen soń «102» arnasyna habarlasyp, mán-jaıdy baıan etken. Áje dál sol mezette oqıǵa ornynan tabylyp, kómek kórsetken ýchaskelik ınspektorǵa alǵysyn bildirdi.
«Mektepte oqyp júrgen kezimde «Óskende kim bolasyń?» degen suraqqa únemi «polıtsııa qyzmetkeri» dep jaýap beretinmin. Allaǵa shúkir, sol maqsatyma jettim. 2007 jyldan beri quqyq qorǵaý organynda eńbek etip kelemiz. Áıelim, 3 balam bar. Árıne, ýchaskelik ınspektordyń jumysy ońaı emes. Ár túrli jaǵdaılar oryn alyp jatady. Biraq ózimniń súıikti jumysym bolǵandyqtan barlyq qıyndyqty ońaı eńseremin. Bizdiń maqsatymyz – halyqqa qyzmet etý, qoǵamdyq tártipti qadaǵalaý. Jubaıym jumysyma árkez túsinistikpen qaraıdy», - dedi polıtsııa kapıtany.
