Keıingi jyldary eldiń áýe keńistigi arqyly tranzıt 4 ese artty
ASTANA. KAZINFORM – Kólik mınıstrligi Qazaqstannyń óńirlik avıatsııalyq ári logıstıkalyq hab retindegi róline qatysty túsinik berdi.
- Qazaqstannyń áýe kóligi salasyndaǵy tranzıttik áleýeti turaqty oń serpin kórsetip otyr. 2020 jylmen salystyrǵanda Qazaqstan Respýblıkasynyń áýe keńistigi arqyly oryndalatyn tranzıttik áýe reısteri 4 ese artty, - delingen mınıstrliktiń Kazinform agenttigine bergen jaýabynda.
Atap aıtqanda, tranzıttik tasymaldardyń ósýine Qazaqstannyń Eýropa men Azııa arasyndaǵy baǵyttardaǵy tıimdi geografııalyq ornalasýy, áýejaı jáne júk ınfraqurylymynyń damýy, halyqaralyq baǵyttar jelisiniń keńeıýi, sondaı-aq eldiń áýe keńistigin paıdalanatyn sheteldik avıakompanııalar sanynyń kóbeıýi yqpal etip otyr.
- Tranzıttik áleýetti damytý jáne Qazaqstannyń óńirlik avıatsııalyq ári logıstıkalyq hab retindegi rólin nyǵaıtý boıynsha jumystar jalǵasyp keledi, - dep atalyp ótken vedomstvo aqparatynda.
Aıta keteıik, jaqynda «Nursultan Nazarbaev halyqaralyq áýejaıy» AQ Basqarma tóraǵasy Beken Seıdahmetov Qazaqstannyń áýe kóligi salasynda tranzıttik áleýet joǵary ekenin aıtqan edi.
2026 jyldyń 7 aıynda Qazaqstan áýejaılary 18,2 mln jolaýshyǵa qyzmet kórsetip, 102 myń tonna júkti tirkedi.
