Keıingi jyldary buzaqylyq derekteri kóbeıip barady - Gennadıı Shıpovskıh
ASTANA. KAZINFORM – Qazaqstanda buzaqylyq áreketter — mektepterdegi agressıvti minez-qulyqtan bastap, kóshedegi tóbelester kóbeıip barady. Bul týraly senator Gennadıı Shıpovskıh málim etti.
– Sońǵy ýaqytta el ishinde urlyq, orynsyz janjal, beıádep áreketter men kópshilik aldynda tóbeles sekildi keleńsiz kórinister jıilep ketti. Mundaı buzaqylyqtar qoǵamda úreı týdyryp, jurtshylyqtyń ádilet pen tártipke degen senimin álsiretedi. Mekterde de buzaqylyq órship tur, ıaǵnı balalar oqýǵa bara ma álde tóbeleske bara ma?! – dedi G.Shıpovskıh Úkimet basshysynyń atyna joldaǵan saýalynda.
Depýtattyń aıtýynsha, 2022 jyly usaq buzaqylyq boıynsha 15 282 is tirkelse, 2023 jyly 17 429, al 2024 jyly bul kórsetkish 22 myńǵa jýyqtaǵan. Mundaı quqyq buzý derekteri jyl saıyn turaqty túrde artyp otyr. Ol bul jaǵdaıǵa júıeli profılaktıkanyń joqtyǵy, beınebaqylaýdyń jetkiliksizdigi jáne jastarmen jumystyń álsizdigi sebebinen bolǵanyn atap ótti.
- Qoǵamdyq tártip pen azamattyq qaýipsizdik – áleýmettik turaqtylyqtyń negizi. Buzaqylyqqa qarsy kúresti kúsheıtý úshin Úkimet tarapynan naqty sharalar qabyldaý qajet. Birinshiden, buzaqylyq pen usaq buzaqylyqtyń aldyn alý jónindegi keshendi ulttyq jospar qabyldaý kerek. Ekinshiden, jergilikti atqarýshy organdar men ishki ister organdarynyń profılaktıkalyq jumystaryn kúsheıtip, ýchaskelik polıtsııa ınspektorlarynyń áleýetin arttyrý mańyzdy. Úkinshiden, jastar arasynda tártip pen jaýapkershilikti kúsheıtetin, ıaǵnı otbasylyq tárbıe men mekteptegi moraldyq-etıkalyq qundylyqtarǵa negizdelgen jańa baǵdarlamalar ázirleý qajet. Tórtinshiden, qoǵamdyq oryndarda beınebaqylaý júıelerin keńeıtý arqyly quqyq buzý jaǵdaılaryn der kezinde anyqtaý múmkindigin arttyrǵa bolady. Sonymen qatar buzaqylyq jasaǵandarǵa jazany qatańdatý máselesin qarastyrý kerek, ásirese, buzaqylyq qaıtalanǵan kezde tıisti jaýapkershilikti kúsheıtý qajet, – dedi Gennadıı Shıpovskıh.
Eske salsaq, byltyr Shyǵys Qazaqstanda qyzdar arasynda bolyp jatqan álimjettik týraly maqala jazǵan edik.