Keıingi jeti jylda memleket 419 aqyn-jazýshyǵa qalamaqy tólegen
ASTANA. KAZINFORM — Mádenıet jáne aqparat mınıstrligi Kazinform saýalyna joldaǵan jaýabynda bıýdjet esebinen qalamaqy alǵan aqyn-jazýshylardyń sanyn atady.
«Buryndary esh jerde jarııalanbaǵan qoǵamdyq mańyzy bar ádebıet boıynsha 2017-2023 jyldary 419 ádebıettiń avtorlyq quqyǵy satyp alynyp, ıaǵnı avtorlarǵa qalamaqysy tólenip, basyp shyǵaryldy da, óńirlerdegi kitaphanalarǵa taratyldy. Avtorlyq qalamaqy 1 avtorlyq paraq úshin (40 myń belgige) 6 eń tómengi jalaqy mólsherine teńestirilgen», — dep jazylǵan jaýapta.
Al byltyr 53 qalamger memleketten qalamaqy alǵan.
«2023 jyly memlekettik tapsyryspen qoǵamdyq mańyzy bar ádebıetti satyp alý baǵyty boıynsha 53 qalamgerdiń shyǵarmasyna avtorlyq qalamaqy tólendi. Avtorlyq qalamaqy 1 avtorlyq paraqqa 6 eń tómengi jalaqy, ıaǵnı 2023 jyly 420 myń teńge mólsherinde bolǵanyn atap ótemiz», — delingen mınıstrlik málimetinde.
