Keıingi úsh jylda elimizde ekotýrıster sany 40%-ǵa ósti

ASTANA. KAZINFORM - Keıingi jyldary Qazaqstanda ekologııalyq týrızmge degen qyzyǵýshylyq turaqty túrde artyp keledi. Máselen, 2022 jyly ekotýrıster sany 2 mıllıon adamǵa jetse, 2024 jyly bul kórsetkish 2,8 mıllıonǵa kóbeıip, 40%-ǵa ósti. Al 2023 jyly ekotýrıster sany 2,4 mıllıon adam bolǵan.

Bul týraly QR Týrızm jáne sport mınıstrligi málim etti.

Mınıstrliktiń derekterine qaraǵanda, saıahatshylar arasynda Almaty mańyndaǵy ulttyq parkter, atap aıtqanda, Іle-Alataý ulttyq parki, Sharyn shatqaly, Altynemel jáne Kólsaı kólderi eń kóp suranysqa ıe baǵyttar sanalady.

Búginde elimizdegi 14 ulttyq saıabaq turaqty týrızm qaǵıdattaryna saı ınfraqurylymdy damytý baǵytynda jumys istep keledi. Týrısterdiń jaıly demalysy úshin vızıt-ortalyqtar, kempıngter, glempıngter jáne ózge de nysandar salynýda.

Keıingi jyldary taǵy 8 zamanaýı vızıt-ortalyq paıdalanýǵa berildi. Olar aqparattyq júıelermen, baǵyttar kórsetilgen navıgatsııamen jáne negizgi ınfraqurylymmen jabdyqtalǵan.

- Bul ortalyqtar kelýshilerge tabıǵı ekojúıe, jabaıy janýarlar mekeni, arnaıy marshrýttar men qorǵalatyn aýmaqta júrý erejeleri jóninde aqparat usynady.
Ekotýrızmdi damytý – tabıǵı murany saqtaýǵa, eldiń týrıstik áleýetin arttyrýǵa jáne óńirlerdiń turaqty damýyna úles qosady,- delingen habarlamada.

Osyǵan deıin Qazaqstan taý shańǵysy týrızmin álemdik standarttarǵa saı damytýǵa nıetti ekeni týraly jazdyq.