Keıingi úsh jylda 7 myńǵa jýyq jasóspirim qylmys jasaǵan – Bas prokýratýra
ASTANA. KAZINFORM- Keıingi úsh jylda Qazaqstanda kámeletke tolmaǵan 7 myńǵa jýyq jasóspirim qylmys jasaǵan. Olardyń árbir ekinshisi aýyr jáne asa aýyr qylmystar sanatyna jatady. Osy kezeńde 2,5 myńǵa jýyq jasóspirim sottalǵan, taǵy 3 myńy polıtsııanyń profılaktıkalyq esebinde tur. Tek bıyldyń ózinde býllıng faktileri boıynsha 2 myńnan astam ótinish túsken.
Osy máseleler Qazaqstan Respýblıkasy Bas Prokýrory Berik Asylovtyń tóraǵalyǵymen ótken Zańdylyqty, quqyqtyq tártipti qamtamasyz etý jáne qylmysqa qarsy kúres jónindegi úılestirý keńesiniń otyrysynda talqylandy. Qatysýshylar jasóspirimder arasyndaǵy quqyq buzýshylyqtardyń, býllıngtiń, sýıtsıdtiń jáne nashaqorlyqtyń aldyn alý, sondaı-aq balalardy qorǵaý júıesin jetildirý máselelerin qarady.
Otyrysqa Premer-Mınıstrdiń birinshi orynbasary Nurlybek Nálibaev, Quryltaı Tóraǵasynyń orynbasary Dınara Zakıeva, Prezıdenttiń kómekshisi Eldar Tolǵanbaev, Úılestirý keńesiniń músheleri, Quryltaı depýtattary, memlekettik organdardyń basshylary, sondaı-aq beınekonferentsbaılanys arqyly oblys prokýrorlary men ákimderi qatysty.
Baıandamalarmen Bas prokýratýranyń Sotqa deıingi tergep-tekserýdiń jáne qylmystyq qýdalaýdyń zańdylyǵyn qadaǵalaý qyzmetiniń bastyǵy Dáýlet Aqylbekov, Іshki ister mınıstriniń orynbasary Igor Lepeha jáne Oqý-aǵartý vıtse-mınıstri Jaıyq Sharabasov sóz sóıledi.
Balalardy qorǵaýdyń praktıkalyq tetikterin talqylaý barysynda Dınara Zakıeva qaıtalanǵan anyqtaý jaǵdaılaryn qosa eseptegende, 800 myńnan astam balanyń kómekke muqtaj ekenin atap ótti. Olardy jeke súıemeldeý maqsatynda otyrysqa qatysýshylarǵa «Qazaqtelekom» AQ-men birlesip ázirlengen «BALAZHAN» biryńǵaı memlekettik platformasy tanystyryldy. Platforma ortalyq deńgeıde jáne óńirlerde anyqtalǵan árbir balanyń jaǵdaıyn, problemalardyń týyndaý sebepterin jáne kórsetilip jatqan qoldaý sharalaryn baqylaýǵa múmkindik beredi.
Otyrys barysynda kámeletke tolmaǵandar arasyndaǵy nashaqorlyqtyń aldyn alý, sondaı-aq tsıfrlyq quraldar arqyly táýekel tobyndaǵy balalardy erte anyqtaý máseleleri de qaraldy. Qaýip-qaterlerdi erte anyqtaý maqsatynda Bas prokýratýra «AiMap» IT-júıesin synaqtan ótkizdi. Júıe esirtki satatyn ınternet-resýrstarǵa turaqty túrde kiretin oqýshylardyń akkaýnttaryn anyqtaýǵa múmkindik beredi.
Tsıfrlyq sheshimdermen qatar, praktıkalyq jobalar da júzege asyrylyp jatyr. Bas prokýratýranyń «Sanaly urpaq» jobasy aıasynda 10 aıda 19 myń reıd júrgizilip, 4 myń jasóspirim profılaktıkalyq esepke qoıylǵan. Túngi ýaqytta oıyn-saýyq oryndarynda 2 400 bala anyqtalǵan. 304 kafeniń alkogol ónimderin satý lıtsenzııalary keri qaıtarylǵan. Nátıjesinde jasóspirimder arasyndaǵy qylmys deńgeıi 7%-ǵa tómendegen.
Jambyl oblysynyń prokýratýrasy bastamasymen 190 mektepte quqyqtyq máseleler jónindegi dırektordyń orynbasary laýazymy engizildi. Nátıjesinde kámeletke tolmaǵandarǵa qatysty qylmystar 24,7%-ǵa, kámeletke tolmaǵandardyń ózderi jasaǵan qylmystar 3,4%-ǵa, al jynystyq qolsuǵylmaýshylyqqa qarsy qylmystar 54,5%-ǵa tómendegen. Osy tájirıbeni respýblıka kóleminde keńeıtý usynyldy.
-Otyrys qorytyndysy boıynsha vedomstvoaralyq profılaktıkany kúsheıtýge baǵyttalǵan mindetter aıqyndaldy. Balalardyń quqyqtaryn qorǵaý komıtetine býllıngti, sýıtsıdtik táýekelderdi jáne ózge de qaýip-qaterlerdi erte anyqtaý boıynsha úılestirýshi róldi bekitý, profılaktıkalyq jumystyń kórsetkishterin ákimderdiń qyzmetin baǵalaý júıesine engizý, sondaı-aq 111 baılanys ortalyǵy arqyly kámeletke tolmaǵandarǵa quqyqtyq kómek kórsetý múmkindikterin keńeıtý usynyldy,-delingen habarlamada.
Bas prokýror «Zań men tártip», «Adal azamat» jáne «Taza Qazaqstan» tujyrymdamalaryn ilgeriletý aıasynda áleýmettik jelilerde balalarǵa arnalǵan paıdaly bilim berý kontentin ázirleý men taratýdyń mańyzdylyǵyn atap ótti. Sonymen qatar ýákiletti memlekettik organdardyń balalardyń qaýipsizdigi men ál-aýqatyn qamtamasyz etý jónindegi jaýapkershiligin arttyrý qajettigine nazar aýdardy.
Osyǵan deıin Jambyl oblysynda jasóspirimder arasyndaǵy janjaldan keıin oqýshy kóz jumǵany týraly jazdyq.
