Keıingi bes jylda qazaqstandyq JOO-lar barlyq negizgi reıtıngter boıynsha turaqty ósip keledi
ASTANA. KAZINFORM – Qazaqstanda joǵary bilim sapasy halyqaralyq reıtıngter arqyly oń baǵalanyp otyr. Bul týraly Úkimette ótken brıfıngte QR Ǵylym jáne joǵary bilim mınıstri Saıasat Nurbek málim etti.
Mınıstrdiń aıtýynsha, keıingi bes jylda qazaqstandyq joǵary oqý oryndary halyqaralyq reıtıngterde turaqty ósim kórsetip keledi.
– Halyqaralyq reıtıngter men baǵalaýlar jetkilikti obektıvti kórinis beredi. Keıingi bes jylda biz barlyq negizgi reıtıngterde turaqty túrde ósip kelemiz. Mysaly, ótken jyly QS reıtıngisinde 27 ýnıversıtetimiz bar. Alǵashqy ýnıversıtetterimiz TOP-300, TOP-500 qataryna endi. Álemdik reıtıngte Ál-Farabı atyndaǵy Qazaq ulttyq ýnıversıteti 163-orynda tur, – dedi mınıstr.
Sonymen qatar Times Higher Education reıtıngisinde alǵash ret 5 qazaqstandyq ýnıversıtet 300–400 tobyna engen. Nazarbaev ýnıversıteti de atalǵan reıtıngke qosylǵan.
Mınıstr ınjenerlik bilim berý sapasyn arttyrý maqsatynda standarttar tolyq qaıta qaralǵanyn atap ótti. Kóptegen tehnıkalyq joǵary oqý oryndary óndiristik polıgondarmen, tehnoparktermen jáne naqty óndiris oryndarymen jabdyqtalǵan.
– Mysaly, ýnıversıtetterdiń óz ken oryndary bar. Bolashaq ınjenerler tájirıbe júzinde burǵylap, óndiris protsesterine qatysady, – dedi spıker.
Mınıstrdiń aıtýynsha, joǵary bilim sapasyn arttyrý jumystary jalǵasady.
– Sońǵy úsh jylda úsh ýnıversıtet lıtsenzııasynan aıyryldy. Taǵy birneshe oqý orny boıynsha tekserý júrip jatyr. Qazirgi ýaqytta keminde eki ýnıversıtet boıynsha tıisti jumystar júrgizilý ústinde, naqty sheshim qabyldanǵan kezde qosymsha habarlaımyz, – dep tolyqtyrdy Saıasat Nurbek.
Aıta keteıik, Ulttyq reıtıngke ilinbegen ýnıversıtetter qarjylandyrýdan qaǵylady.
