Keıingi bes jylda elimizde 1120 mektep salyndy
ASTANA. KAZINFORM – Keıingi bes jylda elimizde 1 mln-nan astam oqýshy ornyna arnalǵan 1120 mektep salyndy. Nátıjesinde úsh aýysymdy mektepter sany men oqýshy oryndarynyń tapshylyǵy tórt ese, al apatty mektepter sany eki ese qysqardy, dep habarlaıdy QR Oqý-aǵartý mınıstrliginiń baspasóz qyzmeti.
Negizgi jobalardyń biri - «Keleshek mektepteri» ulttyq jobasy. Elimiz boıynsha 460 myń oqýshy ornyna arnalǵan 217 mektep salyndy, onyń 84-i aýyldyq jerlerde ornalasqan. Bul mektepterde STEM-zerthanalar, robototehnıka kabınetteri, kovorkıngter, horeografııa jáne sport zaldary qarastyrylǵan. Bastaýysh jáne joǵary synyp oqýshylary bólek bloktarda bilim alady, erekshe bilim berý qajettilikteri bar balalar úshin kedergisiz orta jasalǵan.
Sonymen qatar bilim berý ınfraqurylymyn damytýǵa memleketke qaıtarylǵan aktıvter baǵyttalýda. 2023 jyly qurylǵan Bilim berý ınfraqurylymyn qoldaý qory arqyly 100 myńǵa jýyq oqýshy ornyna arnalǵan 90 nysannyń qurylysy qarjylandyryldy. Onyń 83-i paıdalanýǵa berildi, taǵy jeteýin jyl sońyna deıin ashý josparlanyp otyr.
Jańa mektepter salýmen qatar qoldanystaǵy bilim oshaqtary da jańartylý ústinde. Sońǵy bes jylda 5026 mektep jańǵyrtylyp, 4,5 myńǵa jýyq mektep 7009 zamanaýı pán kabınetimen jabdyqtaldy.
Aldaǵy úsh jylda taǵy 1300 mektepti renovatsııalaý josparlanǵan. Onyń 820-sy aýyldyq jerlerde ornalasqan. Joba ǵımarattardy kúrdeli jóndeýdi, pán kabınetterin, kitaphanalar men ashanalardy jabdyqtaýdy, sport zaldaryn jańartýdy, aýmaqty abattandyrýdy jáne qaýipsizdik júıelerin kúsheıtýdi qamtıdy.
-2026 jyly 60 myńǵa jýyq oqýshy ornyna arnalǵan taǵy 101 mektep salý josparlanyp otyr. Negizgi maqsat - oqýshy oryndarynyń tapshylyǵyn júıeli sheship, qala men aýyl balalaryna birdeı zamanaýı bilim alý jaǵdaıyn jasaý,-delingen habarlamada.
Osyǵan deıin el boıynsha 72 mekteptiń qurylysy aıaqtalatyny týraly jazdyq.
