Keıingi bes jylda bilim granttarynyń sany shamamen 30 myńǵa artty
ASTANA. KAZINFORM — Qazaqstanda joǵary bilimdi memlekettik qoldaý júıesi kezeń-kezeńimen keńeıip keledi. Sonyń nátıjesinde bıýdjet qarajaty esebinen joǵary bilim alý múmkindigine ıe túlekter sany jyl saıyn artyp keledi.
Úkimettiń málimetinshe, sońǵy bes jyl ishinde memlekettik bilim berý granttarynyń sany shamamen 30 myńǵa kóbeıdi. 2025-2026 oqý jylynda olardyń jalpy sany 93 232-ge jetti. Onyń ishinde 77 084 grant bakalavrıatqa, 13 229 grant magıstratýraǵa jáne 2 919 grant doktorantýraǵa bólindi.
Sonymen qatar talapkerlerge jergilikti atqarýshy organdardyń, salalyq birlestikterdiń, joǵary oqý oryndarynyń jáne qoǵamdyq qorlardyń granttary arqyly qosymsha qoldaý kórsetilip keledi.
Joǵary bilimniń qoljetimdiligin arttyrý maqsatynda jańa qarjylyq tetikter de engizilýde. Elimizde jeńildetilgen bilim berý nesıesi jumys isteıdi, al 2025 jyldan bastap otbasylarǵa balalardyń bilim alýyna aldyn ala qarajat jınaýǵa múmkindik beretin «Keleshek» biryńǵaı erikti jınaqtaý júıesi iske qosyldy.
Qazaqstan halyqaralyq bilim berý yntymaqtastyǵyn da keńeıtip keledi. Qazir elimizde AQSh, Ulybrıtanııa, Qytaı, Germanııa, Frantsııa, Ońtústik Koreıa, Reseı jáne basqa da memleketterdiń jetekshi joǵary oqý oryndarynyń 32 fılıaly jumys isteıdi.
Keıingi jyldary qazaqstandyq ýnıversıtetterdiń Qyrǵyzstanda, Ózbekstanda, Tájikstanda jáne Reseı Federatsııasynda fılıaldary ashyldy. Sondaı-aq qazaqstandyq joǵary oqý oryndarynyń jartysynan astamy álemniń 24 elindegi 131 ýnıversıtetpen birlesip qos dıplomdy bilim berý baǵdarlamalaryn júzege asyrýda.
Úkimet málimetinshe, qazaqstandyq joǵary oqý oryndarynyń halyqaralyq reıtıngterdegi kórsetkishteri de jaqsaryp keledi. QS World University Rankings 2026 reıtınginde elimizdiń 20 joǵary oqý orny ense, Times Higher Education 2026 reıtınginde alǵash ret bes qazaqstandyq ýnıversıtet álemniń úzdik joǵary oqý oryndary qataryna kirdi. Sonymen qatar, Nazarbayev University álemniń úzdik 500 ýnıversıtetiniń qataryna endi.
Stýdenttik ınfraqurylymdy damytý jumystary da jalǵasyp jatyr. 2018-2025 jyldar aralyǵynda elimizde 281 jataqhana salynyp, rekonstrýktsııalanyp jáne paıdalanýǵa berildi. Onyń ishinde joǵary oqý oryndarynyń stýdentterine arnalǵan 51 323 oryndyq 182 jataqhana jáne kolledj stýdentterine arnalǵan 20 802 oryndyq 99 jataqhana bar.
2023-2029 jyldarǵa arnalǵan Joǵary bilim men ǵylymdy damytý tujyrymdamasyna sáıkes joǵary oqý oryndarynyń jataqhanalarynda 70 myń jańa tósek-oryn engizý josparlanǵan. Sonymen birge áleýmettik osal sanattaǵy stýdentterge jataqhanada turý shyǵyndaryn óteýdi qosa alǵanda, qosymsha memlekettik qoldaý sharalary qarastyrylǵan.
Eske salaıyq, buǵan deıin elimizde oqý úshin 550 shetel azamatyna bilim granty berilgenin jazǵan edik.
