Keıingi 5 jylda aýyldaǵy emhanalardyń sany 3 ese artty - Prezıdent
2018 jyldan bastap aýyldaǵy emhanalardyń sany 3 ese artqan. Prezıdent Qasym-Jomart Toqaev astanada ótip jatqan halyqaralyq konferentsııada osyndaı málimet keltirdi, dep habarlaıdy Kazinform agenttigi.
«Keıingi 10 jylda Qazaqstan alǵashqy medıtsınalyq-sanıtarııalyq kómektiń keshendi qoljetimdiligin keńeıtip, uıymdastyrý salasynda aıtarlyqtaı jetistikke qol jetkizdi. Nátıjesinde búginde 6 myńdaı uıym alǵashqy medıtsınalyq kómek kórsetip otyr. Bul uıymdarda 30 myńǵa jýyq maman jumys isteıdi. Eldegi bala jasyndaǵy halyqtyń bári aldyn ala medıtsınalyq baqylaýmen qamtylǵan. Ár iri eldi mekende Jastar densaýlyq ortalyǵy bar. Onyń ústine jyl saıyn 3 mılıonnan astam eresek adam skrınnıng pen kásibı tekserýden ótedi», - dedi Qasym-Jomart Toqaev.
Perzıdent aýyl turǵyndaryna medıtsınalyq qyzmet alýda teń múmkindik usyný úshin aýqymdy reformalar júrgizilip jatqanyn atap ótti.
«2018 jyldan bastap aýyldaǵy emhanalardyń sany 3 ese artty. Telemedıtsına jáne qashyqtan monıtorıngileý sııaqty tsıfrlyq tehnologııalar engizilip jatyr. Bul tehnologııalar alǵashqy medıtsınalyq-sanıtarııalyq kómektiń qoljetimdiligin arttyrýda jańa múmkindikter ashady», - dedi Memleket basshysy.
Aıta keteıik, Astanadaǵy Kongress ortalyqta alǵashqy medıtsınalyq-sanıtarııalyq kómek jónindegi Almaty deklaratsııasynyń qabyldanýynyń 45 jyldyǵyna jáne Astana deklaratsııasynyń qabyldanýynyń 5 jyldyǵyna arnalǵan halyqaralyq konferentsııa ótip jatyr.
