Keıingi 5 jylda alǵash ret Aralǵa sý jiberý jospary 100%-ǵa jýyq oryndaldy
QYZYLORDA. KAZINFORM – Bıyl keıingi 5 jylda alǵash ret vegetatsııa kezinde Aral teńizine sý jiberý jospary 100%-ǵa jýyq oryndaldy. Jalpy 977 mln tekshe metr sý jiberildi.
Keıingi jyldary teńizge 350-400 mln tekshe metr sý kelip otyrsa, bıylǵy jyldyń basynan beri bul kólem 2 mlrd tekshe metrden asty, al jyl sońyna deıin taǵy shamamen 500 mln jiberý josparlanyp otyr.
«Nátıjesinde, búgingi tańda Soltústik Aral teńiziniń sý kólemi 22 mlrd tekshe metrge jetti. Teńizge osyǵan deıin vegetatsııa kezinde sekýndyna 7-10 tekshe metr sý jiberilgen bolsa, bıyl sekýndyna 60-70 tekshe metr sý jiberildi», - dep málimdedi Aral-Syrdarııa basseındik ınspektsııasy basshysynyń orynbasary Zeınýlla Qaztoǵanov.
Budan bólek, Aqshataý-Sorǵaq jáne Qamystybas kólder júıesine 45 mln tekshe metrden astam sý jiberildi. Bul balyq sharýashylyǵy men týrızimdi damytýǵa tıimdi áser etip otyr. Máselen, keıingi jyldary Aral teńiziniń mıneralızatsııasy azaıyp, balyqtyń kóbeıýine jaǵymdy áser etýde. Teńiz tartylǵannan beri jergilikti balyqshylar jylyna 400 tonna ǵana balyq aýlasa, qazir 7,5-8 myń tonnaǵa deıin balyq aýlaıdy.
76 jastaǵy Qaratereń aýylynyń turǵyny, balyqshy Kúntýǵan Turǵanbaev ómir boıy osy kásippen aınalysyp keledi. Onyń aıtýynsha, týǵan ólkege sý kelgeli jańa múmkindikter paıda bolǵan.
«Kózimizdi ashqannan teńizden balyq aýlaýmen aınalysyp kelemiz. Sý kelgeli balyq ta jandanyp, darııaǵa kirip jatyr. Bıyl byltyrǵyǵa qaraǵanda balyq kóbirek. Araldy osy deńgeıde ustap tursa, balyq sharýashylyǵy damıdy», - deıdi ol.
Osy rette Sý resýrstary jáne ırrıgatsııa mınıstrligi Dúnıejúzilik bankpen birlesip Soltústik Aral teńizin saqtaý jónindegi jobanyń ekinshi kezeńine daıyndalyp jatyr. Qazirgi ýaqytta joba boıynsha qajetti qujattama ázirlenýde. Ekinshi kezeń Soltústik Araldy turaqty sýmen qamtamasyz etýden bastap ekonomıkalyq jáne áleýmettik jobalardy damytýǵa deıingi túrli baǵyttardy qamtıdy.
