Keıingi 5 aıda Qazaqstan Ózbekstanǵa 2 mln tonna astyq eksporttady
TAShKENT. KAZINFORM – Byltyr qyrkúıekten bastap bıyl 16 aqpanǵa deıin Qazaqstan shet elderge 5,4 mln tonna astyq eksporttady, dep habarlaıdy Kazinform agenttiginiń menshikti tilshisi.
«Qazaqstan temir joly» kompanııasynyń aldyn ala málimetine saı, qamtylyp otyrǵan kezeńde eksport kólemi 48,3%-ǵa ósti.
Qazaqstan astyǵyn eń kóp satyp alǵan elder kóshin Ózbekstan bastap tur. 5 aıdan asa ýaqyt ishinde bul memleket 2 mln tonna ónim ımporttady.
Sonymen qatar, Tájikstan (789 myń tonna), Qytaı (679 myń tonna), Iran (644 myń tonna), Ázerbaıjan (319 myń tonna) jáne Aýǵanstanǵa (235 myń tonna) eksporttalǵan astyqtyń kólemi artty.
Aıta keteıik, 2024 jyldyń qorytyndysy boıynsha Qazaqstan ózge elderdiń naryǵyna 8,1 mln tonna astyq shyǵardy. Buǵan qosa, elimiz 2,4 mln tonna un eksporttaǵan. Daıyn ónimdi Ortalyq Azııa elderi, Qytaı jáne Aýǵanstan kóp kólemde ımporttap jatyr.
Eske salaıyq, taıaýda Aýyl sharýashylyǵy mınıstriniń orynbasary Azat Sultanov Qazaqstan Reseı arqyly Eýropaǵa bıdaı eksporttaý kólemin ulǵaıtýdy josparlap otyrǵanyn málimdep edi.
Munymen birge, bıyl elimizde bıdaı egetin alqaptardyń kólemi qysqaryp, ónimdiligi joǵary daqyldar aýmaǵy artady.