Keıingi 3 jylda allergııalyq asqynýlar 1,5 ese artqan
ASTANA. KAZINFORM – Qazaqstanda keıingi jyldary allergııalyq aýrýlar kóbeıip keledi. Ásirese aýyr allergııalyq asqynýlar men balalar arasyndaǵy allergııa mamandardy alańdatyp otyr. Bul týraly QR Densaýlyq saqtaý mınıstrligi resmı saýalymyzǵa bergen jaýabynda málimdedi.
Mınıstrlik málimetinshe, allergııalyq aýrýlardyń qataryna bronh demikpesi, allergııalyq rınıt, atopııalyq dermatıt, taǵamdyq allergııa, esekjem jáne dárilik preparattarǵa joǵary sezimtaldyq jatady. Sońǵy onjyldyqtarda mundaı aýrýlardyń taralýy álem boıynsha turaqty ósip keledi.
– Keıingi 3 jylda jiti allergııalyq jaǵdaılarmen aýrýhanaǵa jatqyzý kórsetkishi 1,5 ese artty. Balalar arasyndaǵy allergııalyq aýrýlardyń kóbeıýi, bronh demikpesiniń artýy, dárilik allergııa men anafılaksııa erekshe alańdaýshylyq týdyrady, - delingen mınıstrlik jaýabynda.
Mınıstrlik deregine sáıkes, keıingi jyldary anafılaktıkalyq shok, Stıvens – Djonson jáne Laıell sındromy sııaqty aýyr allergııalyq jaǵdaılar da jıilegen. Mamandar mundaı asqynýlar kóbine jas jáne eńbekke qabiletti adamdar arasynda kezdesetinin aıtady.
Vedomstvo málimetinshe, damyǵan elderde halyqtyń shamamen 20%-y allergııalyq rınıtpen aýyrady. Sonymen qatar eresekterdiń 10%-ynda jáne balalardyń 8%-ynda taǵamdyq allergııa kezdesedi. Al atopııalyq dermatıt ómir boıy halyqtyń 20%-yna deıin áser etýi múmkin.
Eske salaıyq, buǵan deıin qazaqstandyq ǵalymdar jýsan tozańynan týyndaıtyn allergııaǵa qarsy jańa preparatty zerttep, klınıkalyq synaqtaryn júrgizip jatqanyn habarlaǵan edik.
