«Keıki mergen» teleserıaly Táýelsizdik kúni merekesinde kórermenge jol tartpaq
ASTANA. QazAqparat - 1916 jylǵy Torǵaı dalasynda bolǵan ult-azattyq kóterilistiń batyry, ataqty mergen Nurmaǵanbet Kókembaıuly týraly telehıkaıa 16 jeltoqsanda ekranǵa shyǵady dep josparlanýda. Bul týraly «Keıki mergen» telehıkaıasynyń keńesshisi Shóptibaı Baıdildın málim etti, dep habarlaıdy QazAqparat agenttigi.
«Keıki batyr - erligimen halyq jadynda máńgi qalǵan adam. Alaıda, Keńes úkimeti kezinde batyrdyń atyn ataýǵa tyıym salyp, keıingi urpaqqa áıgili mergen jaıynda mardymdy málimet jete qoıǵan joq. Men Keıki Kókembaıuly týraly 1963 jyldan beri zerttep kele jatyrmyn. Onyń kózin kórgen adamdarmen kóp jyldar boıy birge júrdim. Sol arqyly babamyzdyń erlik isterine ábden qanyǵyp, «Keıki batyr» degen kitabymdy jazyp shyqtym. Onyń ómiri men óneri kınoǵa suranyp-aq tur. Bul telehıkaıa aty aıtyp turǵandaı batyrdyń ómiri men órligin ásirese mergendik sheberligin kórermenge kórsetpekshi. Búgingi urpaqty batyr babasymen tanystyratyn keremet týyndy bolady degen úmitim bar. 16 bólimnen turatyn telehıkaıa Táýelsizdiktiń 27 jyldyǵyna tartý bolyp, 16 jeltoqsanda kórermenge jol tartpaq», - dedi Arqalyq qalasynyń qurmetti azamaty, ólketanýshy Shóptibaı Baıdildın.
Onyń aıtýynsha, el arasynda taralǵan «Amangeldi kóz mergen, Keıki qol mergen» degen sózdiń mánisi - Amangeldi qaı nysanany da kózdep atyp, kózdegenin múlt jibermegen mergen bolsa, Keıki kez-kelgen nysanany júgirip kele jatyp ta, atpen shaýyp júrip te shapshań atyp túsire beretin bolǵan. Onyń jastaıynan myltyq atýǵa ábden mashyqtanǵany sonshalyq, qandaı qımyl ústinde bolsa da nysanany dál kózdeıdi eken.
Búginde batyrdyń beınesin tolyq ashyp, osyndaı jurt bilmeıtin qyrlaryn tanytý maqsatynda kóptegen eńbekter jazyla bastady. Áıgili «qolmergen» jaıynda Aqan Nurmanovtyń «Qulannyń ajaly» atty tarıhı romany jáne aqyn Serik Turǵynbekulynyń «Keıki batyr» tarıhı dastany bar. Sonymen qatar, Ahmethan Baıjan «Qulan Keıki batyr» atty derekti hıkaıattar jınaǵyn, Áýbákir Qylyshbaıuly «Qulan Qypshaq Keıki batyrdan soń» kitapshasyn jaryqqa shyǵardy. Endi mine qazaq kınosynyń altyn qory taǵy bir tarıhı týyndymen tolyqpaq.
Esterińizge sala keteıik, Prezıdent N.Á.Nazarbaevtyń «Bolashaqqa baǵdar: rýhanı jańǵyrý» maqalasy aıasynda «Qazaqstan» ulttyq telearnasynyń tapsyrysymen «Projects House» kompanııasy 1916 jylǵy ult-azattyq kóterilisiniń uıymdastyrýshylarynyń biri Keıki batyr jaıynda «Keıki Mergen» atty telehıkaıa túsirýdi qolǵa alǵan bolatyn. Qazirgi tańda bul tarıhı serıal Murat Bıdosovtyń rejısserligimen Otyrar memlekettik arheologııalyq qoryq-mýzeıiniń aýlasyndaǵy Etno keshende jáne Kóne Otyrar qalasynda túsirilýde.
Nurjaýǵan Muqanova
