Keıki batyrdyń rólin somdaıtyn akter belgili boldy
ASTANA. QazAqparat - "Keıki mergen" tarıxı-dramalyq telexıkaıasynda batyrdyń rólin akter Darhan Súleımenov somdaıdy. Bul týraly «Qazaqstan» teleradıokorporatsııasynyń basshysy Erlan Qarın Feısbýktegi paraqshasynda jazdy, dep habarlaıdy QazAqparat tilshisi.
«Ulttyq arnanyń bıylǵy eń úlken jobalarynyń biri - "Keıki mergen" tarıxı-dramalyq telexıkaıasynyń túsirilimi bastalyp ketti. Telexıkaıanyń basty keıipkeri - Keıki mergendi Ǵ.Músirepov atyndaǵy qazaq memlekettik akademııalyq balalar men jasóspirimder teatrynyń akteri Darhan Súleımenov somdaıdy», - dep jazdy Erlan Qarın.
Onyń jazýynsha, telehıkaıanyń stsenarııin Serjan Zákiruly jazǵan, keńesshileri - tarıxshy Berik Ábdiǵalıuly men ólketanýshy Shóptibaı Baıdildın, rejısseri - Murat Bıdosov. Stsenarııdiń sońǵy nusqasy jazýshy, dramatýrg, Dýlat Isabekovtyń aldynan ótip, Ulttyq arnanyń sarapshylar keńesinde talqylanǵan.
Buǵan deıin, ol «Qazaqstan» teleradıokorporatsııasy janynan qurylǵan kórkem telehıkaıalardy irikteý jónindegi Sarapshylar keńesi Keıki batyr týraly týyndy ıdeıasyn maquldaǵanyn aıtqan bolatyn.
Keıki (Nurmaǵanbet) Kókembaıuly (1871-1923) - 1916 jylǵy Torǵaıda bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taıpasynyń Qulanqypshaq rýynan shyqqan. Qostanaı oblysy Amankeldi aýdanynyń Baıtýma qopasynda dúnıege kelgen. Jastaıynan ańshy, mergendigimen, ójettigimen aımaqqa tanylǵan. Onyń quralaıdy kózge atqan mergendigine saı el aýyzynda «Amangeldiniń kózi mergen, Keıkiniń qoly mergen» degen sıpattama saqtalǵan.
Keıki batyrdyń ádebıettegi beınesi Ǵabıt Músirepovtiń «Amangeldi» pesasynda Kete batyr bolyp beınelenedi. Maqan Jumaǵulovtyń «Qyran qazasy qııada» kitabynda jumbaqtalyp aıtylady. Keıkiniń qarasózde jasalǵan kórkem beınesi Aqan Nurmanovtyń «Qulannyń ajaly» atty romany edi. Alaıda keńes zamanynda shyqqan onda da aty anyq aıtylmaǵan. Keıki beınesi óz atymen anyq aıtylyp, qanyq boıaý deregimen túgeldenip shyqqan shyǵarma Serik Turǵynbekulynyń «Keıki batyr» tarıhı dastany (Almaty, «Bilim», 2001).
Keıki batyr Kókembaıulynyń urpaqtary Qostanaı oblysynyń Amangeldi aýdanyndaǵy Aqtas, Tasty eldi mekenderinde turady. 1996 jyly Keıki batyrdyń 125 jyl tolýyna baılanysty as berilip, eskertkish ornatyldy.
