Keıki batyrdyń DNQ saraptamasy qańtarda tolyqtaı daıyn bolady

ASTANA. QazAqparat - Keıki batyrdyń DNQ saraptamasynyń qorytyndysy 2017 jyldyń qańtarynda daıar bolady. Bul týraly búgin Astanada ótken baspasóz máslıhatynda QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.

Mınıstrdiń sózine qaraǵanda, batyrdyń bas súıegin qalpyna keltirý jumystaryna Majarstan men Germanııanyń aldyńǵy qatarly mamandary jumyldyryldy.

«Sonymen qatar DNQ saraptamasy boıynsha atqarylyp jatqan jumystarǵa da osy eki eldiń ǵalymdary tartyldy. Osy rette germanııalyq ǵalymdardy osy mańyzdy jumysqa tartqany úshin Nursan Álimbaıǵa úlken alǵysymdy aıtamyn»,-dedi Muhamedıuly.

Onyń aıtýynsha, DNQ synamanyń nátıjeleri aldaǵy jyldyń qańtarynda jarııalanatyn bolady.

«Nursan Álimbaı aldyn ala osy máselemen aınalysqan edi, olar DNQ boıynsha kózdiń jáne teri túsin de anyqtady. Batyr qaratory, alasa boıly, keń ıyqty jáne myǵym deneli adam bolǵan»,-dedi mınıstr.

Baspasóz máslıhatynan belgili bolǵandaı, Keıki batyrdyń basy boıynsha jasalǵan músinniń sáıkestigi 98,7 paıyzdy qurap otyr.

QR Memlekettik ortalyq mýzeıiniń dırektory Nursan Álimbaı bul músin batyrdyń kelbetine tolyqtaı sáıkes ekenin jetkizdi.

Eske sala ketsek, qazan aıynyń basynda Majarstanda Keıki batyrdyń bas súıegin qalpyna keltirý jumystary bastalǵan bolatyn.

Vengrııanyń jaratylystaný ǵylymdary mýzeıiniń antropologııalyq bólimine jetekshilik etetin Agnesh Kýshtar Keıki batyrdyń bas súıegin qalpyna keltirý jumystaryn óz basshylyǵyna alǵan edi.