Keıki batyrdyń bas súıegin elge jetkizý birneshe jylǵa sozylyp ketýi yqtımal

ASTANA. QazAqparat - 1916 jyly ult-azattyq kóteriliste qazaq jaýyngerlerin bastaǵan kóshbasshylardyń biri, qazaq jerin bodandyqtan qutqarý úshin janyn pıda etken ataqty Keıki batyrdyń bas súıegin óz Otanyna jetkizý úderisi birneshe jylǵa sozylyp ketýi yqtımal. Bul týraly búgin halyqpen eseptik kezdesý ótkizgen QR Mádenıet jáne sport mınıstri Arystanbek Muhamedıuly málim etti.

«Aptasyna bir márte turaqty túrde Reseıge hat joldap otyramyn. Bizdiń otandastarymyz bul iste bizge bosańsýǵa múmkindik bermeıdi, bul qýanyshty jaǵdaı. Menińshe bul másele jaqyn ýaqyttary sheshimin tabady, reseılik tarap ózderiniń kelisimderin berdi», - deıdi mınıstr.

Onyń sózine qaraǵanda, Keıki batyrdyń bas súıegin elge jetkizý birneshe jylǵa sozylyp ketýi yqtımal.

«Bizdiń ǵalymdar bas súıektiń qaıda jatqandyǵyn anyqtady. Almatydaǵy memlekettik mýzeıdiń dırektory bastaǵan ekspedıtsııa muraǵattaǵy qujattardy tapty. Endi tek tehnıkalyq máselelerdi sheshý ǵana qaldy. Ol qanshaǵa sozylatynyn aıtý qıyn, birneshe jyl bolýy múmkin. Belsendi áriptestiktiń arqasynda biz ózimizge qundy jádigerdiń elge oralýyna qol jetkize alamyz dep sanaımyn», - dedi A.Muhamedıuly.

1916 jyly ult-azattyq kóterilistiń dańqty qolbasshylarynyń biri, ataqty mergen Keıki batyr óz eli úshin basyn báıgege tikkendigi belgili. Batyrdy qyzyl ásker aıýandyqpen óltirip, eki qoly men basyn kesip alǵan. Batyr babamyzdyń basy áli kúnge Sankt-Peterborda saqtaýly tur. Buny QR Syrtqy ister mınıstrliginiń suraýyna oraı 1995 jyly Reseı Syrtqy ister mınıstrligi de jaýap hatynda rastaǵan. Ult-azattyq kóterilistiń júz jyldyǵyna oraı, batyrdyń basyn qaıtaryp, týǵan jerine jerleý máselesin Úkimet qolǵa alýdy josparlap otyr.