Keıki batyrdyń bas súıegi qashan jáne qaıda jerlenetinin arnaıy komıssııa sheshedi

ASTANA. QazAqparat - Búgin Keıki batyrdyń bas súıegi qashan jer qoınyna beriletindigi belgili bolady. Bul týraly QR Mádenıet jáne sport mınıstri Arystanbek Muhamedıuly Úkimet otyrysynan keıin BAQ ókilderiniń saýalyna oraı aıtty, dep habarlaıdy QazAqparat.

«Keıki batyrǵa qatysty qazir saǵat 12.00-de Imanǵalı Nurǵalıulynda (QR Premer-Mınıstriniń orynbasary) úlken jınalys bolady. Búkil bizdiń ǵalymdar, Qostanaıdyń ákimi osy jerde»,-  dedi mınıstr.

Osy rette BAQ ókilderi Keıki batyrdyń bas súıegi qaı ýaqytta, qaı jerge jerlenetindigin surady.

«Komıssııanyń sheshimin aldyn ala aıtqan yńǵaısyz ǵoı. Árıne, Keıki batyr - bizdiń maqtanyshymyz. Sharany joǵary deńgeıde ótkizý úshin qazir arnaıy jınalyp otyrmyz. Ol komıssııaǵa senator Serik Aqylbaı, Myrzataı Joldasbekov jáne basqa da belgili ǵalymdarymyz kirgen»,-  dedi ol.

Sonymen qatar mınıstr Keıki batyrdyń bas súıegin Vengrııaǵa nelikten ushaqtyń ekonom klasymen jetkizilgendigin de túsindirip berdi. «Bas súıekti ǵalymdar (Vengrııaǵa) apardy. Máselen, ǵalym bıznes klaspen barsa, zań buzýshylyq bolady. Ortalyq mýzeıdiń dırektory bıznes-klaspen ushsa, sizder ol nelikten bıznes-klaspen ushady deıtin edińizder», - dedi Muhamedıuly.