Keıki batyr kesenesiniń janynan panteon salyna ma

QOSTANAI. QazAqparat - Qostanaı oblysy Amangeldi aýdanynyń ákimdigi Keıki batyr kesenesi janynan salynatyn arnaıy keshenge qatysty pikir bildirdi, dep habarlady QazAqparat.

«Bul bastama boıynsha naqty sheshimder qabyldanǵan joq. Arnaıy keshen salý úshin oblys basshylyǵy resmı túrde ruqsat beredi. Keshen salý - jeke ınvestordyń bastamasy. Al panteon salý týraly sóz qozǵaýǵa áli erterek», - dep túsindirdi Amangeldi aýdany ákiminiń orynbasary Súndet Ǵanıev.

Aıta keteıik, Arqalyq qalasynda belgili jıhankez, metsenat Sapar Ysqaqov, zań ǵylymdarynyń kandıdaty Serik Aqylbaı, sáýletshi Saǵyndyq Smaıyluly, QR Ulttyq murajaıynyń qyzmetkeri, arheolog Aqan Ońǵaruly jıyn ótkizip, Keıki batyr kesenesiniń qasynan keshen salý jobasyn tanystyrǵan edi. Jıynǵa Arqalyq qalasynyń ákimi Eldar Kúzenbaev ta qatysty. Qala ákimi aıtyp ótkendeı, atalǵan keshen turǵyzylsa, óńirimizdegi aıtýly tarıhı- mádenı ortalyqqa aınalady.

«Qazirdiń ózinde «Arqalyq - Torǵaı» tas jolymen júrgen jolaýshylardyń deni Keıki batyr kesenesine aıaldap, quran baǵyshtaıdy. Endi ol jerde murajaı, kórme, kınozal syndy oryndar bolsa, jastarǵa patrıottyq tárbıe berý jolynda sheshimin tapqan aıtarlyqtaı is bolmaq», - dedi Eldar Kúzenbaev jıyn barysynda.

Al ıdeıa avtory Sapar Ysqaqovtyń sózinshe, oblys basshylyǵy maquldasa, qurylys jumystary mamyr aıynda bastalady. Jalpy, Keıki batyr kesenesiniń janynan murajaı, kórme, kınozal, turǵyn úı salý josparlanǵan. Sonymen qatar, batyr kesenesi janynan 9 oryndyq panteon salynýy múmkin.