Keıki batyrdyń úńgiri ulttyq eskertkishterdiń tizimine alynady

ASTANA. KAZINFORM – Ulytaý ulttyq parkindegi 2 tańbaly tas qıratylyp, 5 belgi tastyń joǵalýyna baılanysty qylmystyq is qozǵalǵan. Bul jaıynda Premer-mınıstr Oljas Bektenov Májilis depýtatynyń saýalyna joldaǵan jaýapta málim etti.

- Ulytaý oblysynda «Joshy han» jáne «Alashahan» keseneleri respýblıkalyq mańyzy bar tarıh jáne mádenıet eskertkishteriniń memlekettik tizimine engizilgen. Ýákiletti organdar Aqjar taýlary men «Keıki batyr» úńgirin ulttyq mańyzy bar tabıǵı eskertkishter tizbesine engizip, «Ulytaý» ulttyq tabıǵı parkiniń quramyna engizý jóninde birlesken jumys uıymdastyrady, - delingen resmı jaýapta.

Premer-mınıstrdiń málimetine qaraǵanda, 15 tamyzda «Ulytaý» memlekettik ulttyq tabıǵı parkiniń qyzmetkerleri tańbaly tastardyń ekeýiniń qıraǵanyn jáne bes belgi tastyń joǵalǵanyn tirkegen.

- Quqyq qorǵaý organdary qylmystyq is qozǵady, tergeý issharalary júrgizilip jatyr, - dep jazady Oljas Bektenov.

Resmı derek boıynsha, el aýmaǵynda 276 respýblıkalyq, 12 myńnan astam jergilikti mańyzdaǵy eskertkishter bar.

Eske salsaq, 2016 jyly Reseımen aradaǵy úkimetaralyq kelisimnen keıin Keıki batyrdyń bassúıegi elge alynyp, 2017 jyly Torǵaı-Arqalyq tasjoly mańyndaǵy memorıaldyq keshenge jerlengen bolatyn. 

Keıki úńgiri 1916 jylǵy ult-azattyq kóterilis kezinde batyrǵa pana bolǵan tarıhı oryn retinde belgili.