Keıingi on jylda balabaqshaǵa baratyn búldirshinder kóbeıip keledi - tárbıeshi

QYZYLORDA. QazAqparat – Memleket basshysynyń bıylǵy Joldaýynda aıtylǵan kóptegen máseleler halyqtyń kókeıindegi saýaldarǵa jaýap berdi. Olardyń qatarynda burynnan aıtylyp kele jatqan áleýmettik máseleler de bar. Bul jóninde Qyzylorda oblysy Aral aýdanyndaǵy «Asylym» balabaqshasynyń tárbıeshisi Aıman Nııazova óz oı-pikirin bildirdi, dep habarlaıdy QazAqparat tilshisi.

Onyń aıtýynsha, Joldaýda eldiń aldaǵy jyldarǵa arnalǵan ádeýmettik-ekonomıkalyq jaǵdaıynda júzege asýy josparlanǵan oń ózgerister kóptep qamtylǵan.

«Aıta keterligi, keıingi jyldarda elimizde demografııalyq jaǵdaı joǵary deńgeıge kóterildi. Qashanda balany bolashaǵymyz sanaıtyn halyqpyz ǵoı. Bul bizdi óte qýantady. Qaısybir jyldary elimizde bala týý kórsetkishi birshama tómendep ketkeni belgili. Qazir sol olqylyqtyń orny tolyp, árbir shańyraq bala kúlkisine bólenip jatyr. Meniń balabaqshada tárbıeshi qyzmetimen aınalysyp júrgenime on jyldan asty. Baıqaǵanym, jyl saıyn bizge keletin búldirshinder sany artyp keledi. Qaıbir jyldarda balabaqshaǵa keletin sábıler sany sırep ketkeni de jasyryn emes. Búginde jergilikti basshylyq úshin balabaqsha máselesin sheshý ózekti problemaǵa aınaldy. Dese de, bul baǵytta bizdiń oblysymyzda oń ózgerister bar. Ondaı kórinisti Aral aýdanynan da baıqaýǵa bolady», - dedi Aıman Nııazova.

Atap aıtqanda, aýdanda 3-6 jastaǵy 6 181 bala tolyqtaı balabaqshamen qamtylǵan. Bul baǵytta 59 mektepke deıingi bilim berý uıymy jumys isteıdi.

«Bala tárbıeleý isiniń qanshalyqty jaýapty ári qıyn ekenin jaqsy túsinemiz. Memleket basshysynyń bizdiń jumysymyzdy nazarǵa alyp, aıryqsha basymdyq bergeni kóńilge qýanysh uıalatty. Joldaýda kózdelgen máseleniń bári halyqtyń kókeıindegi saýaldarǵa dóp basyp jaýap bergendeı boldy. Jalaqyny kóterý máselesi bizdiń mamandyqqa jastardyń kóptep kelýine oń septigin tıgizedi degen oıdamyn. Sondaı-aq, sábı kútimine beriletin járdemaqyny bir jarym jasqa deıin tóleý men «Balalar jyly» aıasynda Ulttyq qordyń jyldyq ınvestıtsııalyq kirisiniń 50 paıyzy 18-ge tolǵansha áleýmettik jınaq shotyna aýdarylýy jóninde bergen tapsyrmasy eldiń kókeıindigisin dóp basty», - deıdi ol.