Keıingi kúnderi meniń atyma kóp syn aıtyldy - Ekibastuz ákimi

ASTANA. QazAqparat – Ekibastuz jylý elektr ortalyǵynda (JEO) bolǵan apatqa baılanysty ótken jedel shtabtyń otyrysynda Pavlodar oblysynyń ákimi Asaıyn Baıhanov turǵyndarǵa jedel ári shynaıy aqparat berý baǵytyndaǵy máselelerdi kóterdi, dep habarlaıdy QazAqparat tilshisi.

«Qazir qala turǵyndarynyń áleýmettik jelilerde kóp chattary bar. Oǵan jalǵan aqparat jıi túsip jatyr. Sondyqtan, bul chattarǵa naqty mamandardy engizý kerek. Olar kerek jaýapty resmı túrde usynyp otyrýy tıis. Osyny uıymdastyrý jaǵyn qarastyrý qajet», - dep tapsyrma berdi óńir basshysy Asaıyn Baıhanov.

Bul máselege qatysty pikir bildirgen Ekibastuz qalasynyń ákimi Aıan Beısekın áleýmettik jelidegi birneshe topta tıisti quzyrly organdar jedel jaýap berýmen aınalysyp jatqanyn atap ótti. Munymen qatar, shahar basshysy keıingi kezde óziniń atyna syn kóp túsip jatqanyn málimdedi.

«Chattar negizi kóp. Quramynda qala azamattarynyń birazy bar chattardy meniń orynbasarym qarap otyrady. Qalǵan kishi chattarda ishki saıasat bóliminiń qyzmetkerleri jaýap berip otyrady. Keıingi birneshe kúnde synnyń birazy meniń atyma kelip túsip jatyr. Sebebi, kópshilik jedel aqpartty kútedi», - dep toqtaldy Aıan Beısekın.