Keıingi eki jylda Aqtóbedegi 7 aýylda birde-bir qylmys tirkelmedi - mınıstr

AQTÓBE. QazAqparat – Aqtóbe oblysynyń bes aýdanynda ornalasqan 7 aýylda sońǵy eki jylda qylmys tirkelgen joq. Osyǵan oraı Іshki ister mınıstri Marat Ahmetjanov aýyl ákimderi men ýchaskelik ınspektorlardy memlekettik nagradaǵa usynyp, olardyń tájirıbesin engizý úshin Úkimetke usynys engizbek, dep habarlaıdy QazAqparat tilshisi.

Aqtóbe oblysyna jumys saparymen kelgen mınıstr Marat Ahmetjanov búgin óńirde krımenogendik ahýal qalypty ekenin aıtty. Degenmen qylmystyń kóbi oblys ortalyǵynda tirkelgen. Al aýdandarda kerisinshe, quqyqbuzýshylyq azaıdy.

«Polıtsııa men qoǵam arasyndaǵy tyǵyz baılanys quqyqbuzýshylyqtyń azaıýyna sep boldy. Yrǵyz aýdanynyń Qyzyljar, Alǵa aýdanynyń Qarabulaq, Muǵaljar aýdanynyń Egindibulaq, Temir aýdanynyń Tasqopa, Áıteke bı aýdanynyń Aqkól, Aqtasty, Qaıraqty aýyldarynda sońǵy eki jylda birde-bir qylmystyq is tirkelmedi. Eńbekti baǵalaý kerek. Baǵalanbaǵan eńbekke obal bolady. Ákimderdi, ýchaskelik polıtsııa qyzmetkerlerin marapattaýdy jón kórdim. Úkimetke de olardyń tájirıbesin jan-jaqqa taratyp, memlekettik nagrada berýge usynamyn», - dedi ІІM Marat Ahmetjanov.