Keıingi eki jylda 60-qa tarta jaıaý adamdy velosıped qaǵyp ketken
ASTANA. QazAqparat – Premer-Mınıstrdiń birinshi orynbasary Roman Sklıar Májilis depýtattarynyń saýalyna bergen jaýabynda resmı kólik túrine jatqyzylmaǵan qozǵalys quraldarynyń kesirinen zardap shekkenderdiń statıstıkasyn jarııalady, dep habarlaıdy QazAqparat tilshisi.
«Qazirgi tańda qoǵamda atalǵan quraldardy tizgindeý kezinde jol erejesin buzýdyń kez kelgen formasyna tózbeýshilik qalyptasyp keledi. Densaýlyq saqtaý uıymdarynyń deńgeıinde elektrli samokattardan jáne ózge de qozǵalys quraldarynan zardap shekkenderdiń esebi júrgiziledi. «Statsıonardaǵy naýqastardyń elektrondy tizilimi» aqparat júıesiniń deregi boıynsha, 2021 jyly 25 jaıaý júrginshi veleosıpedpen soqtyǵysyp zardap shekse, 2022 jyly 33 adam, bıyl alǵashqy 3 aıda 4 adam zardap shekken. Ózge naqtylanbaǵan kólikterden 2021 jyly 50 adam, 2022 jyly 51 adam, bıylǵy birinshi toqsanda 10 adam zardap shekken» dep jazylǵan jaýapta.
Sondaı-aq, ol jaýapta atalmysh qozǵalys quraldaryn tizgindeý kezinde zań buzǵan adamdardyń málimetin qaıda joldaýǵa bolatynyn eske salady.
«Jol qozǵalysynyń qaýipsizdigin qamtamasyz etýde, onyń ishinde qaskóı ereje buzýshylardy anyqtaýda azamattar belsendilik tanytyp júr. Olarmen bul turǵydaǵy aqparat almasý jumysy elektrondy úkimet portaly men «E-Ótinish» platformasy arqyly jolǵa qoıylǵan. Sondaı-aq, Іshki ister mınıstrligi 2020 jyldan beri «102» mobıldi qosymshasy arqyly azamattardan dybys jáne beınehabarlama arqyly aqparat alyp keledi. Onyń ishinde jol erejesin buzǵan elektrli samokat tizgindeýshiler de bar», - deıdi birinshi vıtse-premer.
Roman Sklıardyń málimeti boıynsha, búginde velosıped joly Astanada (70 shaqyrym), Almatyda (80,4 shaqyrym), Túrkistan oblysynda (105 shaqyrym), Atyraý oblysynda (24,2 shaqyrym) bar.
