Keıingi bes jylda aýtızmmen tirkelgen balalardyń sany 3 ese ósken
ASTANA. QazAqparat – Keıingi bes jylda eldegi aýtızmmen tirkelgen balalardyń sany 3 esege jýyq ósken. Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova Májilis depýtattarynyń Álıhan Smaıylovqa joldaǵan saýalyna jaýabynda osyndaı málimet berdi, dep habarlaıdy QazAqparat tilshisi.
«Sońǵy bes jylda aýtızm spektri buzylý dıagnozymen esepte turǵan balalardyń sany 3 esege jýyq ósti», - dep jazady vıtse-Premer.
Resmı statıstıka boıynsha, 2018 jyly aýtızmmen aýyratyn 4707 bala anyqtalsa, 2019 jyly olardyń sany 5193-ke, 2020 jyly 6771-ke, 2021 jyly 8796-ǵa, 2022 jyly 12 087-ge jetken.
«Osyǵan baılanysty Úkimet aýtızm spektri buzylý dıagnozyn erte anyqtaý úshin skrınıngterdi uıymdastyrý qaǵıdalaryna tıisti ózgerister men tolyqtyrýlar engizdi. Atap aıtqanda, balalardyń júıke-psıhıkalyq damý shkalasyn ózektendirý júrgizilip, skrınıngterdiń barlyq túrlerin júrgizý algorıtmderin jetildirdi, medıtsınalyq uıymdar men psıhologııalyq-medıtsınalyqpedagogıkalyq komıssııalar (budan ári - PMPK) arasyndaǵy ózara is-qımyl kúsheıtildi», - dep jazady Tamara Dúısenova.
Onyń aıtýynsha atalǵan skrınıngterge turaqty negizde monıtorıng júrgiziledi.
«2023 jyldyń 3 aıynyń ishinde psıhofızıkalyq damý skrınıngimen 774 myńnan astam bala qamtylyp, 8549 balada psıhofızıkalyq damýdyń buzylýy (1,1%) anyqtaldy. Bul balalar odan ári túzetý ádisterin anyqtaý úshin PMPK-ǵa jiberiledi.
2022 jyly Densaýlyq saqtaý mınıstrligi pedıatrııalyq kómek kórsetýdi uıymdastyrý standartyn qaıta qarap, aýtızmdi anyqtaýǵa arnalǵan jańa modıfıkatsııalanǵan skrınıngtik test engizdi», - dedi mınıstr.
