Keıingi 60 jylda Qazaqstan aýmaǵyndaǵy ózenderdiń aǵysy 12,5 tekshe shaqyrymǵa qysqardy

ASTANA. QazAqparat – Búginde Qazaqstan aýmaǵyndaǵy ózen aǵysy 1960 jyldardaǵy kórsetkishpen salystyrǵanda 12,5 tekshe shaqyrymǵa azaıdy. Mundaı derekter Ekologııa jáne tabıǵı resýrstar mınıstrligi ázirlegen Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdama-jobasynda keltirilgen, dep habarlaıdy QazAqparat tilshisi.

«Qazaqstan aýmaǵyndaǵy ózen aǵysy 1895-1960 jyldar kezeńimen salystyrǵanda 12,5 tekshe shaqyrymǵa azaıdy. Onyń ishinde 9 tekshe shaqyrym nemese qysqarǵan jalpy kóleminiń 72%-y jergilikti ózenderdiń úlesine. Al qalǵan 28%-y nemese 3,5 tekshe shaqyrym transshekaralyq ózenderge tıesili. Jergilikti ózender aǵynynyń qysqarýy Balqash-Alakól jáne Tobyl-Torǵaıdan basqa barlyq basseınde boldy», - delingen Ashyq NQA portalynda jarııalanǵan tujyrymdama-jobasynda.

Buryn habarlaǵanymyzdaı, atalǵan jospardy oryndaý aıasynda 2029 jylǵa deıin Qazaqstan boıynsha 25 jańa sý qoımasy salynady.

Sonymen qatar, sý resýrstary boıynsha bilim alýǵa nıetti talapkerler úshin bilim granty kóbeıedi.