Keıingi 5 jylda abonentter ınternetti 4 ese kóbirek paıdalana bastady

ASTANA. QazAqparat - Beeline Qazaqstannyń bas atqarýshy dırektory Evgenıı Nastradın elimizde ne sebepti uıaly baılanys qyzmeti qymbattap jatqanyn túsindirdi, dep habarlaıdy QazAqparat tilshisi.

Onyń aıtýynsha, keıingi 5 jylda elimizde ár abonent ınternetti 4 ese kóbirek paıdalana bastady.

«Ár operatorda túrli shyǵyndar bar. Árıne, elektr energııasynyń tarıfi ózgerse, bul da ónimniń ózindik qunyna áser etedi. Sonymen qatar, qyzmet aýqymy aıtarlyqtaı ósti. 2018 jyly Beeline baılanysyn paıdalanǵandardyń árqaısysy nebári 4 GB jumsap keldi. Al qazir bul kórsetkish 17 GB-qa jetti. Bul turǵyda 4 GB-men 17 GB-ǵa jumsalatyn tarıf birdeı bolmaıtyny túsinikti, ıaǵnı osy baǵytta shyǵyndar da artyp otyr», - dedi Evgenıı Nastradın Ortalyq kommýnıkatsııalar qyzmetindegi baspasóz máslıhatynda.

Onyń sózine qaraǵanda, baılanys operatorlary osy sebepti tarıfterdiń túrli nusqasyn usynyp otyr.