Keıingi 4 jylda densaýlyq saqtaý júıesin qarjylandyrý 2 ese ósti

ASTANA. QazAqparat – Keıingi 4 jylda densaýlyq saqtaý júıesin qarjylandyrý 1,2 trln teńgeden 2,5 trln teńgege deıin ósti. Bul týraly Ortalyq kommýnıkatsııalar qyzmetinde ótken brıfıngide Densaýlyq saqtaý vıtse-mınıstri Tımýr Sultanǵazıev aıtty, dep habarlaıdy QazAqparat tilshisi.

«Mindetti áleýmettik medıtsınalyq saqtandyrý (MÁMS) engizilgenge deıin densaýlyq saqtaý salasyndaǵy qarjy tapshylyǵy aýyr boldy. Tapshylyq 400 mlrd teńgege deıin jetti. Densaýlyq saqtaýdyń jeke shyǵyndary barlyq shyǵyndardyń 39%-yn qurady. MÁMS-tiń 4 jylǵy jumysynan keıin densaýlyq saqtaý júıesi áleýetiniń ósýi baıqalady. Máselen, byltyr adamdar óz emhanalarynda 2019 jylmen salystyrǵanda 3,2 ese kóp qyzmet aldy», - dedi Tımýr Sultanǵazıev.

Onyń sózinshe, MÁMS engizilgennen beri densaýlyq saqtaý júıesine baǵyttalǵan qarjy kólemi artqan.

«Densaýlyq saqtaý júıesin qarjylandyrý osy kezeńde 1,2 trln teńgeden 2,5 trln teńgege deıin ósti. MÁMS-tiń arqasynda elimizdiń bir turǵynynyń densaýlyǵyna jumsalatyn ortasha shyǵystar eki ese ósti - 56 myń teńgeden 122 myń teńgege deıin», - dep toqtaldy Tımýr Sultanǵazıev.

Vıtse-mınıstrdiń aıtýynsha, MÁMS engizilgen tusta osy júıemen 1 300 uıym qyzmet kórsetken. Al qazir olardyń sany 2 myńǵa jetti.