Keıingi 4 jylda balabaqsha kezeginde turǵandar sany eki ese azaıdy

ASTANA. QazAqparat – Elimizde mektepke deıingi uıymdarda 1,1 mln bala qamtylǵan. Bul týraly Oqý-aǵartý mınıstrliginiń Mektepke deıingi bilim departamentiniń dırektory Natalıa Jumadildaeva aıtty, dep habarlaıdy QazAqparat tilshisi.

«Qazirgi kezde elimizde 1 mln 115 myń balany qamtyp otyrǵan 11 myń 104 mektepke deıingi uıym jumys istep tur. Atap aıtqanda, mektepterdegi arnaıy toptarda, balabaqshalarda, shaǵyn ortalyqtarda mektepke deıingi daıarlyq aıasynda 337 myń bala bilim alyp jatyr, ıaǵnı jetkinshekterdi qamtý deńgeıi 96 paıyzdy qurady», - dedi N. Jumadildaeva Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, keıingi 4 jylda balabaqsha kezeginde turǵandar sany eki esege azaıdy. Búgingi tańda 2 jastan 6 jasqa deıingi balalardy qamtý 90 paıyzǵa jýyq, 3 jastan 6 jasqa deıin 98,3 paıyz boldy.

«2022 jyldyń aıaǵynda tirkelgen málimetke qaraǵanda, elimiz boıynsha 6 jasqa deıingi 250 myńnan asa bala kezekte tur. Mektepke deıingi uıymdarda oryn tapshylyǵy máselesin sheshý baǵytynda úsh jylda 223 myńǵa jýyq jańa oryndy qamtamasyz etý josparlanǵan», - dedi departament basshysy.

Osy oraıda ol 2028 jylǵa qaraı 2 jastan 6 jasqa deıingi balalardy balabaqshamen qamtý deńgeıi 100 paıyzǵa jetetinin aıtty.

Budan buryn habarlanǵandaı, mektepke deıingi bilim berý uıymdarynda 97 408 pedagog jumys istep júr. Onyń ishinde aýyldarda 41 596 (42,7%), al qalada 55 811 (57,3%) adam qamtylǵan.

Elimizdegi mektepke deıingi uıymdardyń 70 paıyzǵa jýyǵy qazaq tilinde bilim berip jatyr.