Keıingi 3 jylda jasandy túsik jasatý azaıdy
ASTANA. QazAqparat – Sońǵy 3 jylda resmı tirkelgen aborttar kórsetkishi tómendedi. Bul týraly «Ashyq» NQA portalynda jarııalaǵan 2030 jylǵa deıin ana men bala densaýlyǵyn saqtaý qyzmetin damytý tujyrymdamasynda jazylǵan, dep habarlaıdy QazAqparat tilshisi.
«Qazaqstanda abort burynǵydaı bala týýdy retteýdiń keń taralǵan praktıkasy bolyp tabylady. Resmı túrde tirkelgen jasandy túsik jasatý kórsetkishi sońǵy 3 jylda tómendep keledi. Alaıda, Eýropanyń basqa elderindegi 1000 áıelge shaqqandaǵy uqsas kórsetkishten 3-ten 7-ge joǵary.
Sońǵy jyldary medıtsınalyq kórsetilimder boıynsha abort sany ulǵaıdy. Barlyq aborttar boıynsha olardyń úlesi 2021 jyly 75%-dy qurady. Onyń ishinde jaǵdaıdyń 60%-y áıel densaýlyǵymen jáne 40%-y náreste damýynyń týa paıda bolǵan aýytqýlarymen baılanysty boldy», - dep jazylǵan tujyrymdamada.
Qujatta qamtylǵan Densaýlyq saqtaý mınıstrliginiń deregine saı, árbir altynshy júktilik ózdiginen nemese merziminen buryn bosanýmen aıaqtalady.
«Sonymen qatar, qylmystyq túsikter sanynyń 2,3 esege (2019 jylǵy 29 jaǵdaıdan 2021 jylǵy 69 jaǵdaıǵa deıin) ósýi baıqalady. Bul túsikke arnalǵan dárilik zattardyń baqylaýsyz erkin qoljetimdiligimen baılanysty», - delingen tujyrymdamadaǵy mınıstrlik aqparatynda.
Sondaı-aq, qujatta «Ańsaǵan sábı» baǵdarlamasyn iske asyrylýy týraly málimetter keltirilgen. Atap aıtqanda, osy joba aıasynda eki jyl ishinde 4 myń sábı dúnıege keldi.
