Keıingi 10 jylda elimizde tirkelgen nekeler sany 36 myńǵa azaıǵan - statıstıka

ASTANA. QazAqparat – Elimizde tirkeletin nekeler sany azaıyp ketken. Bul týraly Ulttyq stastıtıka bıýrosynyń 10 qyrkúıek - Otbasy kúnine oraı jarııalaǵan málimetterinde aıtylǵan, dep habarlaıdy QazAqparat.

Ulttyq bıýro málimetterine qaraǵanda, 2012 jylmen salystyrǵanda 2022 jyly tirkelgen nekeler sany 164 myńnan 128 myńǵa deıin azaıdy, ıaǵnı, nekelesý koeffıtsıenti de tómendedi. Eger 2012 jyly 1000 adamǵa 9,81 juptan kelse, 2022 jyly — 6,54 jup boldy.

Óńirler bólinisinde qarasaq, turǵyndar arasyndaǵy nekelesýdiń eń joǵary koeffıtsıenti Astanada tirkeldi, 1000 adamǵa 8 jup. Eń tómengi koeffıtsıent Aqmola men Abaı oblystarynda - 6,1.

Aıta ketý kerek, sońǵy 20 jylda nekege turýshylardyń eń joǵary kórsetkishi 2012-2013 jyldary baıqaldy. Máselen, 2002 jyly nekelesý koeffıtsıenti 6,6 bolǵan.

Neke sanynyń tómendeý faktorlarynyń biri — nekege turǵan halyqtyń jas qurylymynyń ereksheligimen baılanysty. Eger 2010 jyldary týý kórsetkishi joǵary bolǵan 1985-1990 jylǵy urpaq nekege tursa, 2020 jyldan keıin týý kórsetkishi tómen bolǵan 1995-2000 jyldary dúnıege kelgen urpaq otbasyn qura bastaǵan.

Erler úshin nekege turýdyń ortasha jasy (alǵashqy neke) 28, áıelder úshin — 25,2 jas.