Keıingi 10 jylda elimizde AITV juqtyrǵandar sany 2 esege artty

ASTANA. QazAqparat – Sońǵy 10 jyldyń ishinde Qazaqstanda adamnyń ımmýn tapshylyǵy vırýsy (AITV) ınfektsııasymen syrqattanýshylyq 2 esege artty. Bul týraly Úkimet otyrysynda baıandama jasaǵan Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Sońǵy 10 jyldyń ishinde Qazaqstanda adamnyń ımmýn tapshylyǵy vırýsynyń (AITV) ınfektsııasymen syrqattanýshylyq 2 esege artty. Atap aıtqanda 2013 jylǵy 11,5-ten 2022 jyly 20,3-ke deıin. Juqtyrylǵan ımmýn tapshylyǵynyń sındromynan (JITS) bolatyn ólim-jitim kórsetkishi 1,7 esege tómendedi», - dedi Ajar Ǵınııat.

Mınıstr sózinshe, osydan eki jyl buryn Qazaqstan 2030 jylǵa deıingi ımmýn tapshylyǵy sındromyn joıý jáne Jahandyq Strategııanyń maqsattaryna qol jetkizý jónindegi mindettemelerin qabyldaǵan.

«AITV-men ómir súretin barlyq adamdardyń 95%-y ózderiniń mártebesi týraly bilýi kerek. Sondaı-aq, olardyń 95%-y emdelýi qajet. 95% naýqastyń emi tıimdi bolýy mańyzdy», - dep toqtaldy Ajar Ǵınııat.