Keıingi 10 jylda áleýmettik nysandardyń elektr qýatyn tutyný kólemi 25% azaıǵan

NUR-SULTAN. QazAqparat – Memlekettik mekemeler keıingi 10 jylda energııa únemdeýdiń arqasynda 188 mln teńge únemdegen. Bul týraly QR Indýstrııa jáne ınfraqurylymdyq damý mınıstriniń orynbasary Marat Qarabaev málim etti, dep habarlaıdy QazAqparat tilshisi.

«Qazaqstanda energııa tıimdilik baǵdarlamasy birneshe jyl buryn qolǵa alynǵan. Búgin sol baǵdarlamanyń aıaqtalýyna baılanysty qorytyndy konferentsııa ótkizip jatyrmyz. Memlekettik mekemelerde jaryq shamdaryn energııa únemdeıtin túrilerine aýystyrý jobasy osy baǵdarlama kezinde qolǵa alynǵan. Onyń ózi úlken dúrbeleń týǵyzyp, kóptegen mekemeler qysqa merzimde búkil shamdy aýystyrýǵa qarsy bolǵan. Qazir biz memlekettik mekemelerden qyzýly jaryq shamdaryn taba almaıtyn da shyǵarmyz», - dedi Marat Qarabaev «Qazaqstan energııa tıimdilikti arttyrý» jobasyn qorytyndylaǵan saltanatty sharada.

Aıtýynsha, baǵdarlama iske asqan kezeńde energııa aýdıtimen baılanysty 1,5 myń shara qolǵa alynǵan.

«Dúnıejúzilik bank óz kezinde 20 mln teńgeniń grantyn bólgen bolatyn. Bul qarjyǵa mektep, balabaqsha sııaqty 96 áleýmettik nysannyń energııa júıesine aýdıt jasaldy. Osylaısha atalǵan nysandarda energııa tutyný kólemi 25% azaıyp, 188 mln teńge únemdeldi. Bul bıýdjet qarajatyn únemdeýdiń bir úlgisi deýge bolady. Negizgi kórsetkishter týraly aıtsaq, 2012 jyldan beri eldiń jalpy ishki óniminiń energııa syıymdylyǵy 11% tómendegen», - dedi vıtse-mınıstr.

Osy sharaǵa qatysqan QR Parlamenti Májilisiniń depýtaty Eldos Abaqanov elordadaǵy «Býdepesht», «Family Village» sııaqty avtonomdy ınfraqurylymǵa jalǵanǵan nysandardyń problemasyn depýatattyq saýal retinde joldap, mınıstrlik deńgeıinde kóterýge daıyn ekenin aıtty.