Keıde balalardyń qatygezdigi jan túrshiktiredi – QR Prezıdenti

ASTANA. QazAqparat – Otbasynda zorlyq-zombylyq jasaǵandar zań aıasynda tıisti jazasyn alýy kerek. Bul týraly Túrkistanda ótip jatqan Ulttyq quryltaıdyń «Ádiletti Qazaqstan – Adal azamat» atty ekinshi otyrysynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Urpaq tárbıesine yqpal etetin sharalarǵa basa mán berýimiz kerek. Bul salada kemshilikter kóp ekeni jasyryn emes. Mekteptegi tárbıe jumysy aqsap tur. Sońǵy kezde oqýshylardyń bir-birine qysym, zorlyq-zombylyq, álimjettik kórsetýi jıi bolyp ketti. Ony, tipti, beınetaspaǵa túsirip, áleýmettik jelige salý «sánge» aınaldy. Keıde balalardyń qatygezdigi jan túrshiktiredi», - dedi Prezıdent.

Memleket basshysy otbasyndaǵy zorlyq-zombylyq qoǵamdaǵy taǵy bir keleńsiz jáne ózekti másele bolyp turǵanyna nazar aýdartty.

«Mundaı zańsyz áreket jasaǵandar mindetti túrde zań aıasynda tıisti jazasyn alýy kerek. Elimizdiń bolashaǵy otbasynda qalyptasady. Al, otbasy baqytty bolsa, elimizdiń keleshegi de jarqyn bolady. Shyǵystyń uly ǵulamasy ál-Farabı tárbıesiz berilgen bilim – adamzattyń qas jaýy ekenin aıtqan. Bala tárbıesi – eń aldymen, ata-ananyń mindeti», - dedi Qasym-Jomart Toqaev.

Prezıdent keıde ata-analar durys tárbıe berýdiń ornyna ózderi jaǵymsyz úlgi kórsetetindigine qynjylys tanytty.

«Balalardyń tártibine beıtarap, selqos qaraıdy, tipti, jaýapkershiliktiń bárin mektepke, muǵalimderge júkteıdi. Memlekettiń eń basty baılyǵy – adam, ıaǵnı azamattar. Bul – anyq nárse. Desek te, ata-analar balany memleket, Úkimet ne qoǵam úshin emes, eń aldymen, ózi úshin dúnıege ákeledi. Árbir ata-ana sanaly urpaq ósirýge basa mán berýge tıis. Sol sııaqty mektep te – bilimniń ǵana emes, tálim-tárbıeniń ordasy. Balanyń boıyna bilimmen qatar adamgershilik qundylyqtardy sińirý – ustazdyń mindeti. Osyǵan oraı, balabaqshadaǵy jáne mekteptegi tárbıe isine bárimiz qoǵam bolyp mán berýimiz kerek, sondaı-aq, belsene atsalysýymyz qajet», - dedi Memleket basshysy.