Keıde 10-15 saǵattap daıyndaldym - sheteldik 8 ýnıversıtettiń grantyn jeńip alǵan oqýshy
QONAEV. KAZINFORM – Almaty oblysyndaǵy №39 gımnazııanyń 11-synyp oqýshysy Almat Saqııdýlla sheteldik oqý oryndarynan shaqyrtý aldy.
Jas túlekke University of Miami, Elmhurst, Caldwell, Augustana, UNO, FIU syndy AQSh-tyń bedeldi 7 ýnıversıtetinen shaqyrtý kelse, onyń 6-ýy grant usynǵan. Sondaı-aq Malaızııadaǵy Xiamen University Malaysia oqý ordasy ony tolyq grantpen qabyldaǵan.
Kazinform tilshisi baǵy da janyp, baby da shapqan bolashaq stýdentpen tildesti.
Onyń aıtýynsha, sheteldik oqý oryndaryna túsýdi bala kezden armandaǵan jáne sol úshin kóp jyldar boıy eńbek etken.
- Men Boraldaıda turamyn, jasym - 17-de. Otbasymda beseýmiz. Eń úzdik oqý oryndarynda bilim alý meniń bala kezden armanym bolǵan. Ákem ekeýmiz, ásirese AQSh-ta oqyp kórýdi armandadyq. Keıin arman maqsatqa aınaldy, - dedi ol.
Almat armanyna jetkizetin alǵashqy qadam retinde 6-synypta Nazarbaev Zııakerlik mektebine tapsyrǵan. Alaıda mektepke túse almaǵan. Odan keıin 9-synypta AQSh pen Qazaqstan arasynda oqýshy almasýǵa múmkindik beretin Flex baǵdarlamasyna tapsyryp, onyń fınaldyq kezeńine deıin ótken. Biraq bul joly da sońǵy sátte súringen. Dese de, ol sátsizdikterge moıymaı, eńbektene bergen.
- Eshteńege qaramaı, maqsatyma jetemin dep sheshtim. 11 synypta AQSh pen Malaızııanyń bakalavr deńgeıine tapsyrýǵa bel býdym. 6-synyptan bastap portfolıo jınaı bastadym. Oǵan volonterlik qyzmet, ártúrli jarystardaǵy jeńister, jetistikterimdi qosyp otyrdym. 10-synypta 10-15 saǵattap daıyndalyp, IELTS tapsyrdym jáne 7.0 upaı aldym. Odan keıin halyqaralyq UBT deýge keletin SAT testin 3 ret tapsyryp, sońǵysynan 1420 ball aldym. Sosyn jeltoqsan aıynan bastap oqý oryndaryna esse jiberdim, - dedi ol.
Almattyń bul eńbegi esh ketpegen. Ol osy jyldyń qańtarynan bastap sheteldik ýnıversıtterden shaqyrtý aldy. Qazirgi ýaqytta ol AQSh pen Malaızııadan kelgen shaqyrtýdan bólek, Nazarbaev ýnıversıtetiniń jaýabyn kútip otyr.
- Bolashaǵym týraly áli naqty sheshim qabyldamadym. AQSh-ta sheteldik stýdentterdiń oqýyn toqtatý sekildi derekter bolyp jatyr. Sondyqtan qazir oı ústinde júrmin. Malaızııaǵa barýym da múmkin. Qaıda barsam da, IT salasyn tańdaımyn, - dedi túlek.
Ol mundaı múmkindikterge ıe bolýynyń syry - eńbek pen shynaıy maqsatta ekenin atap ótti.