Keıbir JI jobasyn jasaýǵa AQSh-tan kóri Qazaqstan ońtaıly — IT sarapshy

ASTANA. KAZINFORM – Jasandy ıntellektini medıtsına salasyna engizý úshin Amerıkadan kóri Qazaqstannyń zańnamasy men ekonomıkasy ońtaılyraq bolatyn sátter kezdesedi. Bul týraly IT sarapshylar aıtyp berdi.

IT kásipker Azat Esenov elimizde jasalǵan jobanyń qazir AQSh-ta dańqy shyǵyp júrgenin baıandady.

— Bizde Cerebra atty startap kompanııa bar. Bul — kompıýterlik tomografııa arqyly adamnyń ınsýltqa ushyraýyna boljam jasaý boıynsha álemdegi eń ozyq joba. Ony Almatyda qazaq jigitteri oılap tapqan. Qazir Amerıkada keńinen qoldanylyp júr, - deıdi sarapshy.

Astana Hub bas dırektorynyń keńesshisi, startaptar men tehnologııalardy damytý salasyndaǵy sarapshy Danabek Qalıajdarovtyń aıtýynsha, bul joba AQSh-ta ómirge kelýi múmkin emes kórinedi.

— Bundaı startapty Amerıkada jasaý qıyn. Sebebi ol jaqta adamdardyń tomografııalyq keskinin alý múmkin emes. Bizde zańnama sondaı. Aýrýhanaǵa nemese Densaýlyq saqtaý mınıstrligine habarlasyp, osyndaı jobaǵa adamdardyń aty-jóni óshirilgen tomografııalyq keskin kerek edi deseń, ony alýǵa bolady. Amerıkada ol aqparatty alý úshin birneshe satydan ótý kereksiń, 10 jylǵy ózińniń tarıhyńdy kórsetý kereksiń, aqyry báribir ruqsat ala almaısyń, - deıdi ol.

Odan bólek, Qazaqstan medıtsınasynyń kásibılik deńgeıiniń álemdik standarttarǵa saı bolýy da bundaı jobalardy synaqtan ótkizýge jol ashatyn kórinedi.

— Taǵy bir mysal, adamnyń fotosyna qarap, onyń kóziniń astyndaǵy daqtarǵa taldaý jasaı otyryp, oǵan dıagnoz qoıýǵa bolady eken. Ony synaqtan ótkizý úshin 10 myń adam kerek. Ár adam túgeldeı taldaý úlgilerin tapsyrýy, 4 kún aýrýhanada jatýy kerek. Keıin dárigerler sol taldaý nátıjelerin shyǵarady. Sosyn fotoǵa qarap JI jasaǵan dıagnoz ben taldaý nátıjeleriniń arasynda qandaı da bir baılanys zańdylyǵy baryn tekseredi. Osy zertteýdi Amerıkada júrgizý úshin 10-20 mln dollar ketedi. Al Úndistan, Pákistan, Bangladesh sekildi elderde júrgizý anaǵurlym arzan bolady, biraq bul elderdiń medıtsınasy kenje damyǵandyqtan, zertteýdi durystap júrgize almaıdy. Qazaqstan osy turǵyda eń ońtaıly el sanalady. Sebebi bizdiń elde medıtsına jetik damyǵan jáne ómir súrý quny arzan, - deıdi Azat Esenov.

Aıta keteıik, buǵan deıin alaıaqtar JI-di qoldanǵan jaǵdaıda qalaı qorǵaný kerektigin jazǵan bolatynbyz.